Շաբաթվա մարդիկ. Երազանքներ` ստանդարտ և ոչ այնքան

Սառա Հարությունյան

2016 թ-ին Ավարտել է Հայաստանի պետական մանկավարժական համալսարանի կիրառական արվեստ բաժինը` նկարչություն և հագուստի դիզայն մասնագիտությամբ։

Այժմ աշխատում է երեխաների զարգացման կենտրոնում։

-Փոքրուց ցանկանում էի նկարչուհի լինել։

Ապագայում ցանկանում է բարեգործական հիմնադրամ բացել և նորաձևության սեփական կենտրոնն ունենալ։

Նարեկ Գասպարյան

Ավարտել է Երևանի Կոմիտասի անվան պետական կոնսերվատորիան՝ թավջութակահար է։ Այժմ նվագում է պետական երիտասարդական նվագախմբում։

-Երբ փոքր էի, ուզում էի թավջութակի գնալ, դե պապաս էլ տարավ։

Ապագայում ցանկանում է իր մասնագիտությամբ շատ գումար վաստակել։

Կարեն Մամիկոնյան

Ավարտել է Երևանի Թատրոնի և Կինոյի պետական ինստիտուտի կինոօպերատրության բաժինը։

-Ես 4 տարեկանից դաշնամուր էի նվագում, ուստի անիմաստ էր ինձ հարցնել` ինչ եմ ուզում դառնալ։

Ապագայում ցանկանում է Իսպանիայում կամ Իտալիայում վիլլա ունենալ, նստել պատշգամբում ու գինի խմել։

Անուշիկ Ալավերդյան

Ավարտել է Երևանի Կոմիտասի անվան պետական կոնսերվատորիայի ջազ վոկալ բաժինը։

Շուրջ 15 տարի է երգում է։

-Երբ փոքր էի, ցանկանում էի դաշնամուրի դասատու դառնալ։

Ապագայում ուզում է իր մասնագիտական ոլորտում մեծ բարձունքների հասնել ու գրեմմիի արժանանալ։

Հասմիկ Վարդանյան

Սովորում է Հայաստանի պետական մանկավարժական համալսարանի գեղարվեստական կրթության և կերպարվեստ բաժնում։ Դեռ չի աշխատում։

-Երբ փոքր էի, երազում էի ֆիզիկա և աստղագիտություն ուսումնասիրելով` տիեզերագնաց դառնալ։

Ապագայում ցանկանում է ստեղծել մի վերելակ, որի միջոցով հնարավոր կլինի վայրկյանների ընթացքում հայտնվել մեկ այլ երկրում։

Հրաչյա Ոսկանյան

Ավարտել է Հայաստանի Բաց համալսարանը՝ դիզայներ է։ Շուրջ 6 ամիս է զբաղվում է ուսապարկերի դիզայնով։

-Երբ փոքր էի, ցանկանում էի Անտոնիո Բանդերասի նման դերասան դառնալ։

Ուզում է, որ ապագայում ամբողջ աշխարհն իմանա իր մասին։

Ժակ (Հակոբ Պապիկյան)

1999 թ-ին ավարտել է Հայկական գյուղատնտեսական ակադեմիայի ճարտարագիտության ֆակուլտետի հողաշինարարություն և գեոդեզիա բաժինը։ Արդեն 20 տարի է, ինչ հեռուստառադիոհաղորդավար է։

-Երբ փոքր էի, ցանկանում էի իրավաբան դառնալ, բայց հետո հասկացա, որ իմ տարերքը ռադիոն է։

Այժմ ցանկանում է այնպես ապրել ու աշխատել, որ ապագայում, հետ հայացք գցելիս, զգա, որ հենց այնպես չեն անցել աշխատանքային օրերը։