ԵՐԵՎԱՆ, 12 նոյեմբերի — Sputnik. Հայկական լեռնաշխարհի, այժմյան Թուրքիայի տարածքում գտնվող Վանա լճի հատակին հայտնաբերվել է մոտ 3000 տարվա պատմություն ունեցող պատմական ամրոց։ Այս մասին հաղորդում է ՌԻԱ Նովոստին` հղում անելով թուրքական Անադոլու գործակալությանը:
Նշվում է, որ հայտնաբերված ամրոցն, ամենայն հավանականությամբ, պատկանում է ուրարտական ժամանակաշրջանին:
10 մետր խորության վրա հայտնաբերված ամրոցը մեկ քառակուսի կմ տարածք է զբաղեցնում։
Շուրջ 600 000 տարվա պատմություն ունեցող Վանա լճի մակարդակը պատմական որոշակի ժամանակահատվածում իջել է, ինչի արդյունքում մարդիկ ջրի ափին հիմնվելով` կառուցել են այստեղ տարբեր շինություններ: Սակայն ավելի ուշ, երբ ջրի մակարդակը նորից բարձրացել է, բնակչությունը նորից ետ է քաշվել, իսկ նրանց թողած քաղաքակրթական հետքերը մնացել են ջրի տակ:
Քանի որ Վանա լճի ջուրը աղի է՝ ամրոցի պատերը հիանալի կերպով պապհպանվել են և բոլորովին չեն վնասվել:
Ուրարտուն կամ Վանի թագավորությունը Հայկական լեռնաշխարհի թագավորությունն էր մ.թ.ա. 9–6–րդ դարերում։
