ԵՐԵՎԱՆ, 11 նոյեմբերի–Sputnik. Ընդամենը 30 րոպե միջակայքով առավոտյան 07.00-ից մինչև 22.00-ը կաշխատի «Զվարթնոց» օդանավակայան-Երևան ավտոբուսային երթուղին, իսկ 22.30-ից մինչև 07.00-ը կաշխատի 1 ժամ պարբերականությամբ։
«Զվարթնոց» օդանավակայանից ավտոբուսը շարժվում է ու մի քանի կանգառ նախատեսում։ Կանգառներն արվում են Փարաքար, Արգավանդ գյուղերի մոտ, Կենտրոնական ավտոկայարանի, Մաշտոցի պողոտայի, Շահումյանի անվան դպրոցի, Օպերայի եւ բալետի ազգային ակադեմիական թատրոնի կանգառներում։ Վերջին կանգառը մետրոյի «Երիտասարդական» կայարանի մոտ է:
Իսկ մետրոյի «Երիտասարդական» կայարանից դեպի օդանավակայան շարժվելիս ավտոբուսը կանգառներ կկատարի Կաթողիկե եկեղեցու մոտ, «Հանրապետության» հրապարակում, Ամիրյան փողոցի, Մաշտոցի պողոտայի, Կենտրոնական ավտոկայարանի, Արգավանդ եւ Փարաքար գյուղերի կանգառներում և, վերջապես, «Զվարթնոց» օդանավակայանում:
Երթուղու ավտոբուսներում տեղադրվելու են տերմինալներ, որոնց միջոցով ուղևորները հնարավորություն կունենան ուղեվարձը վճարել բանկային
քարտերով։ Ուղեվարձը 300 դրամ է։
Ի դեպ, Հայաստանի ուղևորահոսքերն ավելացել են։ ՀՀ երկու` «Զվարթնոց» և «Շիրակ» օդանավակայանների ուղևորահոսքը 2017 թվականի հունվար-հոկտեմբեր ամիսներին կազմել է ավելի քան երկու միլիոն՝ 2,154,092 մարդ, որը 22,7 տոկոսով գերազանցում է նախորդ տարվա նույն ամիսների ցուցանիշը:
