ԵՐԵՎԱՆ, 10 նոյեմբերի — Sputnik. Հանրահայտ դերասան Արմեն Ջիգարխանյանի կինը` Վիտալինա Ցիմբալյուկ-Ռոմանովսկայան, որն այս պահին Թբիլիսիում է, Sputnik Գրուզիային տված բացառիկ հարցազրույցում ասել է, որ իր դռները միշտ բաց են ամուսնու առաջ։
«Այն բնակարանը, ուր նա ուզում էր մտնել, դեռ կահավորված չէ։ Նրան այնտեղ տարել են մամուլում աղմուկ բարձրացնելու համար։ Եվ այդ բնակարան է ուզում մտնել ոչ թե Ջիգարխանյանը, այլ օտար մարդիկ։ Ես դեմ եմ օտար մարդկանց հետ ապրելուն»,- ասել է նա։
Մեկնաբանելով իրենց զգացմունքների անկեղծության թեման` Վիտալինան նշել է, որ օտարները չեն կարող գնահատել որևէ մեկի սերը։
«Տարիքային մեծ տարբերությամբ երջանիկ ամուսնությունների բազմաթիվ օրինակներ կան, հատկապես` հայտնի մարդկանց շրջանում։ Անուններ չեմ ասի. բոլորդ էլ գիտեք։ Ստեղծագործող մարդկանց դեպքում դա ավելի հաճախ լինում է անձի մեծության, ուսուցչի, իդեալի հանդեպ հիացմունքի արդյունքում… ես սիրել եմ նրան որպես մեծագույն դերասանի»,- ասել է նա։
Վիտալինան ասել է նաև, որ չի պատրաստվում հասարակությանը ներկայանալ վշտահար կերպարով. դա խաղ կլինի։
«Ինձ պետք չէ։ Ես որևէ վատ բան չեմ արել, ոչ մի բանի համար չեմ ապաշխարում և իմ բոլոր քայլերի համար կարող եմ պատասխան տալ։ Իրավիճակը ոչ իմ պատճառով է այսպես դասավորվել։ Այո, ինձ վշտացնում է նրա պահվածքը, և առաջին հերթին այն պատճառով, որ ինքն իրեն է վնասում։ Չգիտեմ` ինչ է ուտում, ինչ դեղ է խմում, իսկ դեղեր նա պետք է ամեն օր ընդունի։ Ես նրանից այսպիսի բան չէի սպասում, բայց… կա այսպիսի մի բան, որը սեփական արժանապատվություն է կոչվում։ Եվ ես ունեմ այդ արժանապատվությունը։ Ես չեմ պատրաստվում սիրտս բացել միլիոնավոր մարդկանց առաջ»,- ասել է նա։
