ԵՐԵՎԱՆ, 10 նոյեմբերի – Sputnik. ՀՀ Սահմանադրական դատարանը հակասահմանադրական է ճանաչել Վանաձորի ավագանու նիստերը, ինչպես նաև նիստերի ընթացքում ընդունված որոշումները։
Սահմանադրական դատարանում այսօր քննվել է ԱԺ «Ծառուկյան դաշինք» և «Ելք» խմբակցությունների պատգամավորների հայցը։ Այն վերաբերում է նախորդ տարի Վանաձորի ավագանու ընտրություններից հետո տեղի ունեցածին, երբ փակ քվեարկությամբ Վանաձորի քաղաքապետ ընտրվեց Մամիկոն Ասլանյանը, իսկ կուսակցությունները գրավոր հաստատել էին Քրիստ Մարուքյանի թեկնածությունը։
Sputnik Արմենիայի հետ զրույցում «Ելք» խմբակցության պատգամավոր Էդմոն Մարուքյանն ասաց` ճանապարհը մեկն է` պետք է նոր ընտրություններ սահմանվեն։
«Մենք մեկ տարի է ասում էինք, որ սա հակասահմանադրական է, հիմա ունենք ՍԴ–ի որոշումը։ Բարդ էր հասնել դրան, բայց մենք հետևողական եղանք։ Դա մի մեծ կռիվ է, որ դեռ իր հանգրվանին չի հասել։ Հանգրվանը պետք է լինի արդարության վերականգնումը։ Երեք ուժերը ստորագրել են հուշագիր, որով որոշել են ձևավորել տեղական մակարդակում իշխանություն, իսկ այդ քաղաքական կամքը գողացվել է»,–ասաց Մարուքյանը։
ՍԴ-ի որոշումն ուժի մեջ կմտնի 2018 թվականի մարտի 31-ից։ Այն պայմանավորված է իրավական անվտանգության ապահովման սկզբունքով:
Տեղեկացնենք, որ Վանաձորի քաղաքապետ Մամիկոն Ասլանյանը և ավագանու հանրապետական անդամներն առանց քվորում ապահովելու նիստեր են գումարել:
