ԵՐԵՎԱՆ, 10 նոյեմբերի – Sputnik. Մոլդովան կօգտագործի Հայաստանի փորձը դպրոցներում շախմատի դասավանդման համար, լրագրողներին ասաց Մոլդովայի նախագահ Իգոր Դոդոնը Երևանում Շախմատի ակադեմիա այցելելու ժամանակ։
«Ես ապշած եմ, որ Հայաստանում շախմատի զարգացման համար այսպիսի վայրեր կան։ Մեզ մոտ Մոլդովայում չկան այնպիսի պայմաններ, ինչպիսին այստեղի Շախմատի ակադեմիայում են։ Մեզ համար շատ կարևոր է դպրոցական ծրագրում շախմատի պարտադիր դասընթացների ներդրման փորձը», – ասաց Դոդոնը։
«Ես ինքս ամեն օր շախմատ եմ խաղում, առավոտյան ու երեկոյան` առցանց։ Այսօր կինս ինձ ասում է` «նորից շախմատ ես խաղալու»։ Դա հանում է լարվածությունը», – ասաց Դոդոնը։
Շախմատի ակադեմիա այցելելուց առաջ Մոլդովայի նախագահը «Արարատ» կոնյակի գործարանում է եղել, նա հավանել է գործարանը։
Ընդ որում` նա ասաց, որ Մոլդովայում էլ լավ կոնյակներ կան։
«Որոշ բնագավառներում մենք մրցակիցներ ենք, իսկ որոշ բնագավառներում` լրացնում ենք միմյանց», – ասաց Դոդոնը։
Դոդոնը նախատեսում է Հայաստանից «առաջին հերթին, ընկերություն» տանել։
Մոլդովայի նախագահ Իգոր Դոդոնի հայաստանյան այցն առաջինն էր երկկողմանի հարաբերությունների պատմության մեջ։
Մոլդովայի նախագահ Իգոր Դոդոնը հարգանքի տուրք է մատուցել Հայոց ցեղասպանության զոհերի հիշատակին, Մատենադարան ու ԹՈՒՄՈ է այցելել։
