Արմենուհի Մխոյան, Sputnik.
Բնակարանը ձեռք է բերվել ավստրալահայ հասարակական ու մշակութային գործիչ Ստեփան Գրքաշարյանի և նրա տիկնոջ՝ Հիլդա Գրքաշարյանի անձնական միջոցներով: Թեև բնակարանը սոցիալական է և ընտանիքի սեփականությունը չի համարվում, սակայն 29 տարի շարունակ տնակում ապրող Ռեգինա Առուստամյանի համար կարևորը դա չէ, այլ նորմալ բնակարանում ապրելու հնարավորությունը: Ի դեպ, բնակարանն ընտանիքին տրամադրվել է անժամկետ ու անվարձահատույց:
Մայրը՝ Ռեգինա Առուստամյանն ու իր երկու անչափահաս զավակները՝ ութնամյա Կարինեն և յոթ տարեկան Աշոտը, մինչ այս ապրել են թիթեղյա տնակում՝ զուրկ ամեն տեսակի հարմարությունից: Երիտասարդ կնոջը հուսահատվելու առիթ էր տալիս ընտանիքի անօթևանի կարգավիճակ չունենալը:
Նոր տան հարմարություններից ամենաշատն ուրախացել էր 7 տարեկան Աշոտը, ով, առաջին իսկ հնարավորությունը օգտագործելով, ընտրեց իր սենյակը, որտեղ ամեն ինչ իր համար նորություն էր: Շատ ուրախ էր նաև Կարինեն. «Այս նոր տանը շատ լավ է, մեծ է ու լուսավոր։ Եղբայրս իր առանձին սենյակն ունի, իսկ ես մայրիկիս հետ մերը»,-անկեղծանում է Կարինե`միայն ափսոսալով, որ ստիպված է դպրոցը փոխել:
Ռեգինայի ընտանիքը Գյումրի է տեղափոխվել Բաքվից, 29 տարի առաջ, երբ Ռեգինան 8 ամսական էր։ Նրա հայրը՝ Ղարիբ Առուստամյանը, զոհվել է Արցախի ինքնապաշտպանության ժամանակ: Այսօր նրա անունն է կրում Շիրակի մարզի Ողջիի միջնակարգ դպրոցը:
Ռեգինան նախ մայրիկի հետ էր տնակում ապրում, ապա արդեն` ամուսնու հարազատների։ Իսկ, երբ ընտանեկան խնդիրների պատճառով բաժանվել են, Ռեգինան առանձին տնակում է ապրել` արդեն երկու զավակների հետ: «Սա երազ է ինձ համար, երբեք չեմ էլ համարձակվել երազել, որ երեխաներիս հետ բնակարանում եմ ապրելու: Այդ դժվարություններն էին, երևի, պատճառը, որ հիմա ամուսնուս հետ միասին չենք»,-նշեց երիտասարդ կինը՝ հույս հայտնելով, որ նոր օջախում իր ընտանիքի համար այսուհետ միայն ու միայն ուրախություն կլինի:
![Գյումրիում բնակվող Առուստամյանների ընտանիքի նոր բնակարանը Գյումրիում բնակվող Առուստամյանների ընտանիքի նոր բնակարանը - Sputnik Արմենիա](https://cdn.am.sputniknews.ru/img/940/11/9401173_0:0:1599:1004_600x0_80_0_0_dc2294144a257d43473e4c6a93276fa2.jpg)
![Աշոտ Առուստամյանի նոր սենյակը Աշոտ Առուստամյանի նոր սենյակը - Sputnik Արմենիա](https://cdn.am.sputniknews.ru/img/940/13/9401394_0:0:1599:1004_600x0_80_0_0_b4adb19cde5a37f66b8cd5154fa85c8d.jpg)
![Կարինե Առուստամյանի նոր սենյակը Կարինե Առուստամյանի նոր սենյակը - Sputnik Արմենիա](https://cdn.am.sputniknews.ru/img/940/14/9401454_0:0:3263:2050_600x0_80_0_0_3aa6b012b3d14f70179347b243d95521.jpg)
Ռեգինայի ընտանիքի ընտրությունը եղել է բարերարինը, ով մի քանի ամիս առաջ անձամբ էր եկել ու ծանոթացել ընտանիքի տնակային պայմաններին:
Այսօր բնակարան տեղափոխվելու այս ընտանիքի ուրախությունը կիսեցին «Գյումրին առանց տնակների» հիմնադրամի հոգաբարձուների խորհրդի նախագահ Միքայել եպս․ Աջապահյանը, խորհրդի անդամներ, Շիրակի փոխմարզպետ Հարություն Արշակյանը և բարերարների վստահված անձ՝ Սարգիս Համբարձումյանը: