ԵՐԵՎԱՆ, 9 նոյեմբերի — Sputnik. ԱՄՆ–ի H2 Energy Renaissance ընկերությունն ավարտել է ջրածնի և նանոփոշիներ ստանալու տեխնոլոգիաների փորձարկումը։ Ինչպես Sputnik Արմենիայի թղթակցին հայտնեց ընկերության գործադիր տնօրեն Կիրիլ Գիչունցը, թեստավորումն անցկացվել է ամերիկյան համալսարաններից մեկում։
Թեստավորման արդյունքում բանկերի և ներդրողների համար կարելի է նախագիծ կազմել։
«Ջրածին մենք կարող ենք նախկինից 8-10 անգամ ավելի մատչելի գնով ստանալ, իսկ նանոփոշիները` 20-30 անգամ։ Այսօր ջրածնով ավտոլիցքավորման կետեր են հայտնվել։ Ջրածնի 1 կգ այնտեղ 16.5 դոլար արժե։ Մեր հաշվարկները ցույց են տալիս, որ այն 1-2 դոլար արժե։ Ինչ վերաբերում է նանոփոշիներին, ապա նրանք արժեն 60-ից 300-400 դոլար 1 կիլորգրամը։ Մենք կարող ենք 12 դոլար առաջարկել», – նշել է Գիչունցը։
Ընկերությունն արդյունքները ներկայացրել է Կալիֆոռնիայի Ջրածնի Խորհրդին (California Hydrogen Business Council)։ Գիտնականների երազանքը (ընկերությունում հիմնականում հայկական ծագում ունեցող մասնագետներ են) տեխնոլոգիան Հայաստանում օգտագործել ու դրա հիման վրա ստեղծել գիտաարտադրողական կլաստեր` մի քանի հազար ինժեներների ու գիտնականների համար։
Կրկնակի նորարարություն էր ջրից ջրածին սինթեզելու միջոցը։ Ջրի մեջ է իջեցվում մետաղյա թիթեղը, որը պայթեցնում են էլեկտրահիդրավլիկ հարվածով։ Թիթեղից առանձնանում են նանոմասնիկներ, որոնք մասնատում են ջրի մոլեկուլները թթվածնի ու ջրածնի։ Հեղինակները հայտնում են, որ այսօր սա ջրից ջրածին ստանալու ամենաէժան միջոցն է։
«Ջրածնի սինթեզի ընթացքում մշակված նանոմասնինկերը նստվածք են տալիս նանոփոշու տեսքով։ Այլ կերպ ասած` արդյունքում մենք ևս մեկ օգտակար նյութ ենք ստանում առանց ավելորդ ծախսերի»,– հավելեց ընկերության նախագահ Հակոբ Աղայանը։
Գիտնականները դեռ կատալիզատորների 4 տեսակ են փորձարկել` ալյումինօքսիդ, պղինձ, ցինկի օքսիդ, նաև մեկ ոչ մետաղ` գրաֆիտ։
Նանոփոշիներն ամբողջ աշխարհում գնալով ավելի հաճախ են կիրառվում։ Ալյումինի ու ցինկի փոշիները կարելի է ներկերի մեջ ավելացնել` դրանց դիմացկանությունը բարձրացնելու համար, նաև կարելի է օգտագործել օդի մաքրման ֆիլտրերի ու մետաղախեցեղենի արտադրության մեջ։
Պղնձի նանոմասնիկները կարելի է օգտագործել կենսա ու էլեկտրաքիմիական սենսորների մեջ, գրաֆիտը` ավելացնել վառելիքի մեջ` շարժիչների մաշումը կրճատելու համար։ Սրանք տասնյակ հնարավոր գործածումների միայն եզակի օրինակներն են։
