ԵՐԵՎԱՆ, 9 նոյեմբերի — Sputnik, Լաուրա Սարգսյան. Թուրքիան հաստատել է, որ ջավախահայերով բնակեցված Դադեշ գյուղի բնակիչների կովերն անցել են թուրքական տարածք։ Sputnik Արմենիային այս մասին ասաց Ախալքալաքի և Նինոծմինդայի շրջաններից մեծամասնական ընտրակարգով պատգամավոր ընտրված Հենզել Մկոյանը։
Նոյեմբերի 6-ի գիշերը Դադեշ գյուղում երկու գոմ են թալանել: Առևանգել են 21 կով, ձի, շուն, ինչպես նաև տեխնիկա։
«Թուրքիայի սահմանապահները չեն հերքում, որ խոշոր եղջերավոր անասունները թուրքական տարածք են քշվել Դադեշից։ Մենք կովերից 5-ին կարողացել ենք վերադարձնել չեզոք գոտուց»,- Sputnik Արմենիային ասաց Մկոյանը։
Նրա խոսքով, Վրաստանի ուժային կառույցների ներկայացուցիչներն այժմ ակտիվ աշխատում են թուրք գործընկերների հետ` դեպքի հանգամանքները պարզելու համար։ Մկոյանն ընդգծեց, որ թուրք սահմանապահներն այլևս չեն կարող մերժել իրենց տեսախցիկների նկարահանած տեսանյութերը տրամադրելու դիմումը։
«Վրաստանի իշխանությանը նույնպես մտահոգել է այս միջադեպը։ Եթե անգամ անասուններին չհաջողվի գտնել, նրանք ամեն ինչ կանեն տուժածներին սոված չթողնելու համար»,- ասաց Մկոյանը։
Դադեշցիները վախենում են իրենց կյանքի համար` վստահեցնելով, որ իրենց սահմանները պաշտպանված չեն։ Նրանց կարծիքով, եթե թուրքերը կարողանում են վրացական սահմանը հատել և անասուններին գողանալ, ապա կարող են հասնել նաև գյուղի բնակիչներին։
«Այս դեպքից հետո վրաց-թուրքական սահմանի հսկողությունն ուժեղացվել է։ Այսօր մենք նաև ռազմական ոստիկանության շարժ ենք նկատել։ Սակայն գյուղացիները, միևնույն է, դեռ վախենում են»,- Sputnik Արմենիայի հետ զրույցում ասաց գյուղի բնակիչ Հայկուհի Մանասյանը։
Դեպքը հետաքննելու համար գյուղացիներից 15 օր ժամանակ են խնդրել։ Եթե այդ ընթացքում ոչինչ չպարզվի և քայլեր չձեռնարկվի, ապա գյուղացիները պատրաստվում են բողոքի ցույց կազմակերպել և փակել Կարծախ-Ախալքալաք ճանապարհը։
Գյուղացիներն ավելի վաղ ընդգծել էին, որ առանց տեղացիների օգնության հանցագործները չէին կարողանա այդպիսի մեծ գողություն անել։ Ըստ նրանց` պատահական չի եղել նաև այն, որ այդ գիշեր գյուղում լույս չի եղել։
Սամցխե-Ջավախք շրջանի հայաբնակ Դադեշ գյուղի բնակիչները նոյեմբերի 6-ին բողոքի ակցիա էին կազմակերպել Կարծախից Ախալքալաք տանող ճանապարհին: Բնակիչները պահանջում էին գտնել իրենց կովերին, քանի որ շատերի համար դա եկամտի միակ աղբյուրն է: Գյուղացիների բողոքի ակցիան, սակայն, չէր խանգարել, որ Թուրքիայի եկող բեռնատարներն անցնեն այդ ճանապարհով (գյուղը սահմանակից է Թուրքիային)։
Ավելի ուշ երթևեկությունը վերականգնվել էր։
