Լաուրա Սարգսյան, Sputnik Արմենիա
Իսրայելի արտգործնախարար և վարչապետ Բենիամին Նեթանյահուն ոչ բոլորի հետ է անձնական զրույցներ ունենում: Նալբանդյանի հետ նա, մի շարք պաշտոնական միջոցառումներից հետո, հանդիպեց առանձին, տեղեկացրեց քաղաքագետ, «Իսրայել-Հայաստան» միջազգային հասարակական ֆորումի համանախագահ Ալեքսանդր Ցինկերը:
«Սա վկայում է կողմերի շահագրգռվածության ու վստահելի հարաբերությունների մասին», — Sputnik Արմենիայի թղթակցի հետ զրույցում ասաց Ցինկերը:
Նրա խոսքով` Նալբանդյանի այցը մեծ հետաքրքրություն առաջացրեց Իսրայելի մասնագետների, միջազգային հարաբերություններով զբաղվողների և քաղաքագետների շրջանում:
Կասկած չկա, որ հայ-իսրայելական հարաբերությունները համագործակցության նոր փուլ թևակոխեցին. կողմերը խոսքերից գործի անցան, կարծում է Ցինկերը:
«Հայ-իսրայելական հարաբերություններում առկա դինամիկան այս տարի անցկացրած աշխատանքի արդյունք է, իսկ Իսրայելի վարչապետի կողմից Նալբանդյանին իր երկիր հրավիրելը դրա ապացույցն է», — ասաց նա:
Արտաքին գերատեսչության ղեկավարները առանձնազրույցի ժամանակ միանշանակ համաձայնության են եկել որոշակի հարցերի վերաբերյալ: Կողմերը ոչ միայն բացեիբաց քննարկել են կուտակված հարցերը, այլև առավելագույնս «մաքրել են» դաշտը երկկողմ հարաբերությունների զարգացման համար: Նրանք փորձել են հասկանալ միմյանց: Ակնհայտ է, որ անձնական հանդիպման ժամանակ քննարկվել են հարցեր, որոնք կուտակվել էին վերջին տարիների ընթացքում, կարծում է Ցինկերը:
Հայ-իսրայելական հարաբերություններն աշխուժացրել է «Հայաստան-Իսրայել» ֆորումի ոչ քաղաքականացված հասարակական հարթակը, որն աշխատում է բարեկամության միջխորհրդարանական խմբերին աջակցելու ուղղությամբ, ինչպես նաև խորհրդատվությունների համար հենք է նախապատրաստում՝ երկու երկրի մասնագետների և կազմակերպությունների միջև հետագա համագործակցության համար:
Կարճ ժամանակում շատ ձեռքբերումներ է հաջողվել ունենալ: Երկու երկրների միջև ուղիղ չվերթեր են բացվել, հաճախակի են դարձել իշխանական կառույցների ներկայացուցիչների այցելությունները: Հուլիսին Երևան էր ժամանել Իսրայելի տարածաշրջանային կառավարման նախարար Ցախի Անեգբին, սեպտեմբերին եռօրյա աշխատանքային այցով Հայաստան էր ժամանել Քնեսեթի փոխխոսնակը բարեկամության միջխորհրդարանական խմբի պատվիրակության անդամների և «Հայաստան-իսրայել» հասարակական ֆորումի ներկայացուցիչների հետ:
Պատասխան այցով նոյեմբերի 6-7-ը Նալբանդյանը եղավ Իսրայելում: Նա հանդիպեց Իսրայելի կառավարության և խորհրդարանի բարձրաստիճան ներկայացուցիչների, ինչպես նաև Երուսաղեմի հայ հոգևորականության հետ: Քնեսեթի խոսնակ Յուլի Էդելշտեյնի և փոխխոսնակ Տալի Պլոսկովի հետ հանդիպման ժամանակ, կողմերը քննարկել են Իսրայելի կողմից Հայոց ցեղասպանության ճանաչման հարցը:
Հայաստանի և Իսրայելի միջև հարաբերությունների նոր զարգացում կարող է դառնալ վիզային ռեժիմի չեղարկումը և, որպես հետևանք՝ դեսպանատան բացումը, սակայն դրա համար կողմերը դեռ պետք է համատեղ աշխատեն:
