ԵՐԵՎԱՆ, 8 նոյեմբերի — Sputnik, Լաուրա Սարգսյան. Հայաստանը այժմ այն սակավաթիվ երկրներից մեկն է, որտեղ կնախապատրաստեն ապագա օդաչուներին։ Տարբեր երկրներից, այդ թվում Ռուսաստանից, հետաքրքրվել են Հայաստանի ավիաուսումնական կենտրոնի կողմից անցկացվող դասընթացներով, ասաց քաղավիացիայի գլխավոր վարչության պետ Սերգեյ Ավետիսյանը։
«Սա մեր ավիաուսումնական կենտրոնի համար նոր փուլ է։ Օդաչուների նախապատրաստման դասընթացները պահանջված կլինեն ինչպես Հայաստանում, այնպես էլ մյուս երկրներում։ Մենք արդեն հայտ ունենք Ռուսաստանից», – դասընթացների շնորհանդեսի ժամանակ ասաց Ավետիսյանը։
10 մլն դրամ արժողությամբ դասընթացները, երկու փուլով են անցկացվում` 104 ժամ տեսական և 48 ժամ գործնական պարապմունքներ` Piper PA-28-181 օդանավով։ Այն «Զվարթնոցում» արդեն սպասում է իր առաջին ուսանողներին։
«Օդանավի ղեկին նստելուց առաջ ուսանողները պետք է պատրաստվածություն անցնեն առցանց–սիմուլյատորի վրա։ Տեսական պարապմունքների համար նախատեսված է 104 ժամ, գործնական պարապմունքները` 45 ժամ են կազմում», – Sputnik Արմենիայի թղթակցի հետ զրույցում ասաց քաղավիացիայի վարչության թռիչքային գործունեության վարչության ղեկավար, գլխավոր մասնագետ–տեսուչ Միսակ Դոյդոյանը։
Նրա խոսքով` հաջորդ փուլը լինելու է վարժանք ինքնաթիռի վրա, որը նախատեսված է օդաչու ուսանողներին նախապատրաստելու համար։ «Մեքենան» հնարավորություն է տալիս զգալ առավելագույն ծանրաբեռնվածությամբ իրական թռիչքը և տեսանելի դարձնել այն տեղանքը, որի վրայով անցնելու է ինքնաթիռը։
«Այստեղ նաև ուսումնասիրում և նախնական հմտություններ են ձեռք բերում արտակարգ իրավիճակներում իրենց դրսևորելու համար։ Սովորում են, թե ինչպես է պետք ճիշտ գործել ֆորս–մաժորի դեպքում», – ասաց Դոյդոյանը։
Վերջնական փուլը` Piper PA-28-181 օդանավով թռիչքն է լինելու, որը 1.1 տոննա քաշ ունի։ Այն շատ հարմար է ուսանողների համար, նրա բնութագրերն իդեալական են` ուսում անցնելու համար, նրանով թռչելը հեշտ է։
Քննությունները հանձնելուց և հմտություններ ձեռքբերելուց հետո, ուսանողները համապատասխան սերտիֆիկատներ կստանան, որոնք մասնավոր թռիչքներ իրականացնելու հնարավորություն կընձեռեն նրանց ՀՀ քաղավիացիայի գլխավոր վարչության կողմից։
ICAO միջազգային օրենսդրության համաձայն` մասնավոր օդաչուների համար տարիքային սահմանափակումներ չկան. մասնավոր թռիչք կարող է իրականացնել ցանկացած չափահաս տարիքի մարդ։ Սակայն ուսուցում անցնելու համար յուրաքանչյուրը պետք է հատուկ բժշկական հանձնաժողովի թույլտվություն ստանա։
Հայաստանի քաղավիացիան հիմնադրվել է 1933 թվականին։ 1962 թվականին ստեղծվել է ուսումնամարզական էսկադրիլիան, որը 1976 թվականին վերափոխվել է ուսումնամարզական ջոկատի, իսկ 1993 թվականին` ավիաուսումնական կենտրոնի։
