ԵՐԵՎԱՆ, 7 նոյեմբերի — Sputnik. Հայաստանն ու Իսրայելը դեռ երկար պետք է սպասեն երկու երկրի մայրաքաղաքներում դիվանագիտական ներկայացուցչությունների բացմանը, կարծում է քաղաքագետ, «Իսրայել-Հայաստան» միջազգային հասարակական ֆորումի համանախագահ Ալեքսանդր Ցինկերը։
«Ես կզարմանամ, եթե այսօր Հայաստանի և Իսրայելի արտգործնախարարները դեսպանատներ բացելու որոշում կայացնեն»,- Sputnik Արմենիա մամուլի կենտրոնում կայացած ասուլիսի ժամանակ ասաց նա։
Նրա խոսքով` դիվանագիտական ներկայացուցչություններ բացելու համար պետք է ֆինանսական հարցեր լուծել։ ԱԳՆ-ի հատուկ բաժինն է որոշում, թե որ երկրում կարելի է ներկայացուցչություն բացել։
«Կողմերը նախևառաջ պետք է լուծեն վիզայի չեղարկման հարցը։ Ինչպես դա եղավ մյուս երկրների դեպքում։ Իսրայելը վիզաներն այս կամ այն երկրի քաղաքացիների համար չեղարկել է, երբ նրանք միակողմանի կարգով չեղարկել են Իսրայելի քաղաքացիների համար»,- ասաց Ցինկերը։
Արտակարգ և լիազոր դեսպան Արման Նավասարդյանն էլ կարծում է, որ դեսպանատների բացումը բարի կամքի դրսևորում է և երկրների միջև լավ հարաբերությունների գրավական։
«Մենք այս տարի լրջորեն հետևում ենք մեր հարաբերությունների զարգացմանը, և կարծում եմ, որ այս փուլը լուրջ ուղենիշ է մեր երկրների պատմության մեջ»,- ասուլիսի ժամանակ ասաց նա։
Նոյեմբերի 6-ին պաշտոնական այցով Իսրայել ժամանած արտգործնախարար Էդվարդ Նալբանդյանը հանդիպել է Իսրայելի Քնեսեթի խոսնակ Յուլի Էդելշտեյնի և Քնեսեթի փոխխոսնակ, Հայաստան — Իսրայել խորհրդարանական բարեկամության խմբի ղեկավար Թալի Պլոսկովի հետ:
