ԵՐԵՎԱՆ, 7 նոյեմբերի — Sputnik. «Ռոսիա 24» հեռուստաալիքը «Հայկական ակցենտ» հատուկ ռեպորտաժում պատմել է հայկական լոլիկների, գինիների ու կոնյակների, գորգերի ու Հայաստանի առանցքային մտավոր կենտրոնների մասին։
«Հայաստանը մի երկիր է, որտեղ ապրում է աշխարհի ամեն չորրորդ հայը։ Երևանն այստեղ անվանում են գրասենյակ, որտեղ այլ երկրների հայերը ներդրումներ են անում», — ռեպորտաժում պատմել է «Ռոսիա 24» հեռուստաալիքի լրագրող Մարիա Գլադկիխը։
Նա նշել է, որ Հայաստանից Ռուսաստան ամեն տարի հայկական լոլիկով բեռնված ավտոմեքենաներ են մեկնում։ Ռուսաստանում, ԱՄՆ-ում, Ճապոնիայում, Իսրայելում, Ֆրանսիայում պահանջարկ ունեցող հայկական ապրանքներից են նաև գինին ու ծիրանը։ Տարեկան արտադրվող 300 հազար շշից 70%-ն արտահանվում է։
«Վերջին հինգ տարվա ընթացքում մեզ մոտ գինեգործությամբ զբաղվողների թիվը կտրուկ աճել է։ Այս ոլորտում վաղուց աշխատող սփյուռքահայերը մեր երկրում ներդրումներ են արել։ 2016 թվականին 2014 թվականի հետ համեմատ 70%-ով աճել է արտահանումը դեպի Ռուսաստան», — ասել է ՀՀ նախագահ Սերժ Սարգսյանը Գլադկիխի հետ հարցազրույցում։
Ռեպորտաժում հեղինակը հիշատակել է Հայաստանի ևս մեկ հպարտություն` «Մեգերյան Կարպետներ» գորգերը։ Նաև պատմել է Հայաստանում եվրոպական ու ամերիկյան համալսարանների մակարդակով անվճար կրթություն ստանալու հնարավորությունների մասին` «Այբ» դպրոց, UWC Dilijan քոլեջ և այլն։
«Թեև Արարատի զավակներից շատերը հազարավոր կիլոմետր հեռու են ապրում, այդուհանդերձ նրանց երջանկությունը սարերի հետևում չէ. սա նրանց Հայաստանն է։ Ու յուրաքանչյուրը փորձում է իր ներդրումն ունենալ հայրենիքի ապագայի գործում», — ասել է Գլադկիխը։
Մանրամասները դիտեք տեսանյութում։
