ԵՐԵՎԱՆ, 7 նոյեմբերի — Sputnik. ՀՀ աշխատանքի և սոցիալական հարցերի նախարարությունը ընտանիքները գնահատելու գործը փոխանցում է տեղական իշխանություններին, այսօր ՀՀ խորհրդարանի առողջապահության հանձնաժողովում 2018 թվականի պետական բյուջեի քննարկման ժամանակ հայտնեց Աշխատանքի և սոցիալական հարցերի նախարար Արտեմ Ասատրյանը ։
Սոցիալական ծառայությունների մատուցման «մեկ պատուհան» սկզբունքը, որն աշխատանքի և սոցիալական հարցերի նախարարությունը ստեղծում է ամբողջ հանրապետությունում, կփոխանցվի տեղական իշխանություններին։ Նախարարությունը կհետևի տարվող աշխատանքին։ Դրա համար անհրաժեշտ իրավական ակտերն ավելի ուշ կմշակվեն, հավելեց նախարարը։
Ակնհայտ է, որ ընտանիքի սոցիալական կարիքներն ամենալավը կգնահատեն տեղական իշխանությունները, որոնք ուղղակիորեն կամ անուղղակիորեն ծանոթ են իրենց քաղաքում կամ գյուղում տիրող իրավիճակին, նշեց նախարարը։
«Այժմ միջազգային մասնագետների գնահատմամբ ընտանեկան նպաստների տրամադրման հասցեականությունը մեզ մոտ 78% է կազմում։ Իհարկե, սոցիալական աշխատակիցները պետք է գնահատման հստակ չափանիշներ ունենան։ Սակայն որոշ բաներ նրանք պետք է նաև ինքնուրույն գնահատեն։ Իսկ ավելի լավ կարող են գնահատել այն մարդիկ, որոնք նրանց ամեն օր տեսնում են ու լավ ճանաչում են», — նշեց նախարարը։
Նշենք, որ նախարարության գնահատմամբ, Հայաստանում մոտ 104 հազար սոցիալապես անապահով ընտանիք կա։ Սոցիալական ոլորտի աշխատակիցները նրանց ֆինանսական դժվարությունները գնահատում են միավորների համակարգով, որտեղ հաշվի են առնվում ընտանիքի գործազուրկներն ու հաշմանդամները, խոշոր ունեցվածքը (կամ դրա բացակայությունը), արտասահմանից դրամական փոխանցումների ստացումը և այլն։
