ԵՐԵՎԱՆ, 6 նոյեմբերի — Sputnik. Հայաստանի կառավարությունը Խնայբանկի գումարները վերադարձնում է միայն ողջերին, այս մասին ԱԺ-ում հայտարարեց ՀՀ աշխատանքի և սոցիալական հարցերի նախարար Արտեմ Ասատրյանը։
Ավանդները վերադարձնում են 86 և բարձր տարիքի քաղաքացիներին (2017 թվականին` մինչև 1931 թվականի դեկտեմբերի 31-ը ծնված քաղաքացիներին)։ Փոխհատուցումն արտահերթ ստանում են ռազմական գործողությունների մասնակիցները և սահմանամերձ գյուղերի այն բնակիչները, որոնց այգիները մնացել են գնդակոծման գոտում։ Բայց եթե ավանդատուն չի ապրել մինչև նշված տարիքը, նրա ժառանգները չեն ստանա փոխհատուցումը (միայն կինը, ամուսինը, այն էլ` 50%-ը)։
Սակայն եթե անգամ ավանդատուն դիմավորի 2018 թվականը, պետք է ժամանակից շուտ չուրախանա։ Նա պետք է սպասի այն ամսվան, երբ իր անունը կընդգրկեն վճարման ցուցակում։ Եվ միայն դրանից հետո արդեն կարելի է հանգիստ մեռնել։ Մյուս բոլոր դեպքերում նախարարությունը փոխհատուցում է տալիս միայն հերթի մեջ եղած ողջերին և իր մոտեցումը չի պատրաստվում փոխել։
Նշենք, որ ավանդների փոխհատուցման գումարների փոխհատուցումը զգալիորեն քիչ է, քան խորհրդային ռուբլու գնողունակությունը։ Մինչև հազար ռուբլի ավանդի դեպքում 1 ռուբլին հաշվարկվում է 84 դրամով։ Որքան մեծ է Խնայբանկի գրքույկում նշված թիվը, այնքան քիչ է փոխհատուցումը, ընդհուպ մինչև 4 դրամ, եթե ավանդի գումարը գերազանցում է 10 հազար ռուբլին։
