ԵՐԵՎԱՆ, 6 նոյեմբերի — Sputnik. Այսօր առավոտյան Ֆրանսիայի նախագահ Էմանուել Մակրոնը նամակ է հղել Մեծի Տանն Կիլիկիո Արամ Ա կաթողիկոսին: Նամակը հրապարակված է Մեծի Տանն Կիլիկիո կաթողիկոսարանի կայքում։
Իր նամակում Ֆրանսիայի ղեկավարը Մակրոնն առաջին հերթին վստահեցրել է, որ Ֆրանսիան միջազգային իր դաշնակիցների հետ շարունակելու է աշխատել խաղաղության և ապահովության պահպանման համար, հատկապես` Միջին Արևելքում:
Մակրոնը հատուկ ընդգծել է, որ Ֆրանսիան շարունակելու է պայքարել ծայրահեղության դեմ՝ պաշտպանելով ազգային և կրոնական պատկանելիության պատճառներով բռնության զոհ դարձած համայնքներին:
Անդրադառնալով Սիրիայի ճգնաժամին՝ Մակրոնը կարևորել է ճգնաժամի քաղաքական լուծման կարևորությունը, որպեսզի Սիրիայի ժողովուրդը` բոլոր համայնքներով, կարողանան ապրել խաղաղության մեջ:
Ֆրանսիայի նախագահը անդրադարձել է կատարել Հայոց ցեղասպանությանը, նշելով, որ Հայոց ցեղասպանությունից 100 տարի անց էլ Միջին Արևելքը դեռևս ապրում է բռնության և բռնակալության մթնոլորտում։ Մակրոնը վստահեցրել է, որ Ֆրանսիան հավատարիմ է իր դիրքորոշմանը և շարունակելու է շեշտել ճշմարտության ու հավաքական հիշողության պահպանման կարևորությունը աշխարհի բոլոր երկրներում, այդ թվում՝ Թուրքիայում:
Ֆրանսիայի ղեկավարը անդրադարձել է արցախյան հակամարտությանը։ Նա նշել է, որ «Ֆրանսիան լիովին հանձնառու է Արցախի խնդրով բանակցություններում խաղաղ լուծում գտնելու հարցին՝ հօգուտ շրջանի բոլոր ժողովուրդների»:
Մակրոնը միաժամանակ ընդգծել է, որ Ֆրանսիան անկեղծ բարեկամ է Հայաստանի և ամբողջ աշխարհում ապրող հայերի համար:
Նամակի վերջում Ֆրանսիայի նախագահ Մակրոնը վերահաստատել է Ֆրանսիայի և Լիբանանի միջև գոյություն ունեցող հզոր բարեկամությունը՝ Լիբանանը որակելով գոյակցության, բազմազանության և ժողովրդավարության օրինակելի երկիր, ուր հայ համայնքն ունի իր կարևոր դերը:
