ԵՐԵՎԱՆ, 4 նոյեմբերի — Sputnik. Հունաստանում ընթացող շախմատի Եվրոպայի թիմային առաջնության 7-րդ տուրում Հայաստանի հավաքականը պարտվեց Գերմանիայի թիմին։
Հայ շախմատիստները կրեցին երկրորդ անընդմեջ պարտությունը` Գերմանիայի հետ մրցապայքարն ավարտելով 1.5:2.5 հաշվով։
Նախօրեին Հայաստանի հավաքականը նույն հաշվով զիջել էր Ադրբեջանի հավաքականին։
Եվրոպայի տղամարդկանց թիմային առաջնությանը մասնակցում են 39 թիմ։ Հայաստանի հավաքականի կազմում ընդգրկված են Լևոն Արոնյանը, Գաբրիել Սարգսյանը, Սերգեյ Մովսեսյանը, Հրանտ Մելքումյանը, Հովհաննես Գաբուզյանը (մարզիչ՝ Արշակ Պետրոսյան):
Եվրոպայի թիմային առաջնությունը մեկնարկել է հոկտեմբերի 28-ին և կավարտվի նոյեմբերի 6-ին: Առաջնությունն անցկացվում է Հունաստանում։
