ԵՐԵՎԱՆ, 3 նոյեմբերի — Sputnik, Գոհար Սարգսյան. Ծայրահեղ ծանր վիճակում գտնվող փոքրիկներին տեսնելիս բժշկուհի Աննա Չոբանյանը խուճապի չի մատնվում և մարտի է բռնվում մահվան հետ։ Նա ղեկավարում է «Սուրբ Աստվածամայր» բժշկական կենտրոնի ամենաբարդ` մանկական վերակենդանացման բաժանմունքը։ Թե ինչպես է 30 տարի հաղթահարում սթրեսը ծանր բաժանմունքում, համեստորեն պատասխանում է` մոբիլիզացնում եմ ուժերս և օգնում. այլ տարբերակ չկա։
«Եղել են դեպքեր, երբ ասել եմ` վերջ, էլ չեմ աշխատելու, բայց ինչպես տեսնում եք, շարունակում եմ աշխատել»,- ժպիտով պատմեց Չոբանյանը։
Sputnik Արմենիայի հետ զրույցում նա խոսեց բացառիկ դեպքերի մասին։ Օրինակ` քչերը գիտեն, որ տարիներ առաջ Հայաստանում ծնվել է սիամական զույգ։
«Նրանք սերտաճած էին որովայնով, լյարդով, ցավոք սրտի, բաժանելուց հետո մահացան, հնարավոր չեղավ նրանց կյանքը փրկել։ Այս տարիների ընթացքում սիամական զույգ Հայաստանում չի ծնվել»,-պատմեց բժշկուհին։
Մի քանի ամիս առաջ էլ մի աղջնակի գլխում ականջօղ էին հայտնաբերել։ Թե ինչպես էր ականջօղն այնտեղ հայտնվել, մինչև հիմա պարզ չէ։ Բայց բժիշկները կարողացան բարեհաջող ու անհետևանք վիրահատություն անցկացնել։
Չոբանյանի խոսքով` Հայաստանում դեռևս չհաղթահարվող երևույթ կա։ Ամեն ամիս մեկ կամ մի քանի երեխա է շենքի տարբեր հարկերից ընկնում։
«Հիմնականում այն երեխաներն են, որոնք նոր են սկսում քայլել կամ էլ ակտիվ երեխաներ են։ Բայց ամեն դեպքում սա ծնողի անփութության հետևանքն է»,-ասաց բժշկուհին։
Զրույցի ընթացքում նա մեզ ուղեկցեց եզակի դեպքերով երեխաների մոտ։ Բաժանմունքի մի սենյակում պառկած էին ամենափոքրերը։ Նրանցից մեկը ծնվել էր բնածին արատով` կերակրափողը միացած չէր ստամոքսին, մյուսի մոտ էլ աղիները զարգացել էին որովայնից դուրս։ Չոբանյանն ասում է` արտասահմանցի բժիշկները տեսնում են ու զարմանում, որ նման վիրահատություններն այսքան բարեհաջող են անցել։ Իսկ ամենացավալի ու անդառնալի ելքով դեպքերի մասին նախընտրում է լռել։
«Տարիների ընթացքում այդպես է ձևավորվել, որ եթե գիտես` մահվան ելքն անխուսափելի է, փորձում ես քեզ հոգեբանորեն պաշտպանել։ Ամենացավալի դեպքերի մասին չեմ պատասխանի»,- ասաց նա։
Չոբանյանը տեսել է նաև այլ սրտառուչ իրավիճակներ, երբ ծնողները հենց վերակենդանացման բաժանմունքում լքել են երեխաներին, հիմնականում` ուղեղի հետ խնդիրներ ունեցող կամ թերհաս փոքրիկներին։ Բայց «Սուրբ Աստվածամայր» բժշկական կենտրոնի վերակենդանացման բաժանմունքի ղեկավարը մի խնդրանք ունի այդ ծնողներին` թող մի քիչ սպասեն, նոր ծայրահեղ քայլերի դիմեն, որովհետև եղել են դեպքեր, երբ երեխաները վերականգնվել են, բայց արդեն առանց ծնողների։
