ԵՐԵՎԱՆ, 3 նոյեմբերի — Sputnik. Այն 10 տարիների ընթացքում, երբ ես աշխատել են Սեյրան Օհանյանի հետ, նրա կնոջ ոչ մի արտահայտություն անձնական բնույթ չի կրել, ուրբաթ խորհրդարանում լրագրողներին ասաց արտակարգ իրավիճակների նախարար Դավիթ Տոնոյանը (Օհանյանի օրոք պաշտպանութան փոխնախարար)` մեկնաբանելով նախկին նախարարի կնոջ ֆեյսբուքյան գրառումը։
Պաշտպանության նախկին նախարար Սեյրան Օհանյանի կինը` Ռուզաննա Խաչատրյանը, մի քանի օր առաջ Facebook-ում սարկազմով է խոսել «կաբինետային կլյաուզաների» մասին։ Պաշտպանության նախարար Վիգեն Սարգսյանի անունը չի հիշատակվել, բայց հասարակությունը հենց նրան է համարել ուղերձի գլխավոր հասցեատերը։
Ռուզաննա Խաչատրյանը Սարգսյանի` չծառայածների մասին հայտարարությունները «մի դերասանի թատրոն» է անվանել։
Տոնոյանը հրաժարվեց պատասխանել այն հարցին, թե այդ գրառումն արդյո՞ք չի արվել հենց Սեյրան Օհանյանի խնդրանքով։
Պաշտպանության նախարար Վիգեն Սարգսյանը, որն այսօր նույնպես խորհրդարան էր եկել, չմոտեցավ լրագրողներին։
