ԵՐԵՎԱՆ, 3 նոյեմբերի – Sputnik. Հայաստան-ԵՄ համապարփակ համագործակցության համաձայնագրի ստորագրմանը 20 օր է մնացել, բայց հանրության բազմաթիվ հարցերը շարունակում են անպատասխան մնալ, հատկապես` ընտանեկան բռնության թեմայով։ Sputnik Արմենիայի հետ զրույցում նման դիտարկում է արել Հայաստանի դեմոկրատական կուսակցության նախագահ Արամ Սարգսյանը։
Այս համաձայնագրի պահանջով, ՀՀ օրենսդրությունը պետք է մոտարկվի ԵՄ օրենքներին, հիշեցնում է քաղաքական գործիչն ու հավելում, որ դրանով Հայաստանը կզրկվի ինքնուրույն իրավական ակտեր ունենալու և ընդունելու իրավունքից։
Եվրոպայից Հայաստանին պարտադրված օրենսդրական նախաձեռնությունների թվում Սարգսյանը հիշատակում է նաև արդեն մեծ դժգոհություններ առաջացրած «Ընտանեկան բռնության մասին» օրինագիծը։
«Նույնը կարող եմ ասել նաև այն օրենքների մասին, որոնք իրենց մոտ համարվում են միանգամայն ընդունելի։ Մի շարք երկրներում արդեն տրանսգենդերների, պեդոֆիլիայի մասին օրենքներ են ընդունում։ Ի՞նչ ենք մենք ուզում, որպեսզի մե՞նք էլ ընդօրինակենք այդ բարքերը»,- ասում է նա։
Բացահայտելով համաձայնագրի մեկ այլ կետ` Սարգսյանը նշում է, որ դրանով նախատեսվում է ԵՄ տարածքի կոնֆլիկտային կետերում ՀՀ-ի պարտադիր մասնակցությունը, բայց Հայաստանի նկատմամբ ԵՄ պարտավորությունները համաձայնագրում բացակայում են։
«Ամբողջ փաստաթղթում միայն ՀՀ-ի պարտավորություններն են, ԵՄ-ի կողմից որևէ պարտավորություն չկա,- ասում է Սարգսյանը,-մեր իշխանությունները մասնակցել են քննարկումներին, տեղյակ են բոլոր հարցերից, բայց հանրությունն ունի բազում անպատասխան մնացած հարցեր»։
Մինչդեռ այսօրինակ փաստաթուղթը, Սարգսյանի համոզմամբ, առաջին հերթին պետք է քննարկվեր հանրության հետ։ Այն պետք է դրվեր հանրաքվեի, և հանրության պատասխանից պետք է կախված լիներ դրա ստորագրել-չստորագրելը։
«Իշխանությունն առանց հանրության հետ քննարկելու նախաստորագրել է, և հիմա փաստորեն մենք որևէ խմբագրական կամ այլ բնույթի փոփոխություն անելու հնարավորություն չունենք»,-ասում է Սարգսյանը` հիշեցնելով, որ ԵՄ կարգի համաձայն` իրավական ցանկացած փոփոխություն ընդունվում է ԵՄ անդամ 28 երկրների համաձայնությամբ։
«Եթե նրանք որևէ բան համաձայնեցրել են, այլևս չեն ցանկանալու փոխել»,- կարծում է Սարգսյանը։
Հիշեցնենք, որ «Հայաստան-ԵՄ համապարփակ համագործակցության համաձայնագիրը» նախատեսվում է ստորագրել ս.թ. նոյեմբերի 24-ին։ Մինչ այդ գաղտնի պահվող համաձայնագրի տեքստը Եվրոպական Միության խորհուրդը հրապարակել էր հոկտեմբերի 24-ին։
