Արցախի հարցում կարելի է քննարկել փոխզիջումների հարցը, բայց զիջումների մասին խոսելը մազոխիզմ է, լրագրողներին ասաց ՀՀ փոխարտգործնախարար Շավարշ Քոչարյանը։
Հոկտեմբերի 26-ին Սերժ Սարգսյանը հայտարարել էր, որ Ղարաբաղի հարցը չի կարող լուծվել առանց փոխզիջումների ու ցավոտ քայլերի։
Ըստ Քոչարյանի` նախագահը նկատի ուներ փոխզիջումները, ոչ թե միակողմանի զիջումները։
«Եթե Ադրբեջանը խելքի գա, և իրոք լուծումը լինի փոխզիջումային, ապա բնական է, որ դա կողմերի համար ցավալի կլինի: Այսօր, սակայն, դրա որևէ նշան չկա», — ասաց Քոչարյանը։
Նրա խոսքով` Բաքուն առայժմ որևէ հայտարարություն չի արել այն մասին, որ պատրաստ է ինչ-որ բան զիջել:
«Այդ դեպքում համարում եմ մազոխիզմ անընդհատ այս հարցը տալը»,- ասաց Քոչարյանը:
Նա նաև շեշտեց, որ կան հարցեր, որոնք բացառապես վերաբերում են Լեռնային Ղարաբաղի Հանրապետությանը, և առանց Ստեփանակերտի մասնակցության դրանք չեն կարող լուծվել:
