ՀՀ մշակույթի նախարարությունը փորձում է փրկել Գյումրու Աճեմյան փողոցում գտնվող` 19-րդ դարի վերջերին կառուցված պատմամշակութային և ճարտարապետական արժեք ունեցող շենքը։ Այն հայաստանցիներին ավելի հայտնի է «Մեր մանկության տանգոն» ֆիլմից։
«Պատրաստ է նաև շենքի վիրտուալ նախագիծը,- ասել է Ամիրյանը,- վերանորոգումից հետո շենքի առաջին հարկում կլինեն կենտրոններ, որտեղ կարող են հաճախել երեխաները և սովորել տարբեր արհեստներ, երկրորդ հարկում կտեղակայվի Գյումրու պատկերասրահի մասնաճյուղը և երկրաբանական թանգարանը, իսկ բակում նախատեսվում է բացօթյա համերգասրահ: Այն շաբաթ և կիրակի օրերին կծառայի որպես արվեստի վերնիսաժ»:
Շենքը ցարական Ռուսաստանի օրոք ծառայել է որպես փոստատան շենք։ Արմեն Ամիրյանը չի բացառել, որ դրա մի հատվածն էլ կվերածվի փոստի թանգարանի։ Այս հարցի շուրջ, նրա խոսքով, բանակցություններ են ընթանում ՌԴ փոստի ղեկավարության հետ:
