ԵՐԵՎԱՆ, 2 նոյեմբերի — Sputnik. Հայաստանը լավ օրենք կընդունի Ընտանեկան բռնության կանխարգելման և դրա դեմ պայքարի մասին», վստահեցնում է ՀՀ ազգային ժողովի նախագահ Արա Բաբլոյանը։
«Մենք փոփոխություններ չենք կատարի օրենքում, մենք աշխատում ենք, որ այն ավելի լավը դարձնենք։ Վստահ եմ, որ շուտով մենք լավ օրենք կընդունենք»,- լրագրողների հետ զրույցում ասաց Բաբլոյանը։
Նրա խոսքով, օրինագիծը թույլ կտա կարգավորել հասարակությունում առկա բազմաթիվ խնդիրները։
Հայաստանի օմբուդսմեն Արման Թաթոյանն էլ լրագրողներին հայտնեց, որ օրինագծի վիճահարույց կետերի ուղղությամբ համապատասխան աշխատանքներ են տարվում։
«Մենք վիճահարույց կետերի ուղղությամբ աշխատում ենք։ Այժմ մենք քննարկումների փուլում ենք»,- ասաց նա։
Ավելի վաղ ՀՀ արդարադատության նախարար Դավիթ Հարությունյանը նույնպես ընդգծել էր, որ «Ընտանեկան բռնության մասին» օրենքը չի հակասի հայկական ավանդույթներին։
Ընտանեկան բռնությունների կանխարգելմանը և ընտանեկան բռնության զոհերի պաշտպանությանը վերաբերող օրենքի նախագիծը ներկայացվել է հանրային քննարկման։
Նշենք, որ նոր օրինագիծը թույլ է տալիս ձերբակալել ցանկացած մարդու անմիջապես իր տանը, եթե որոշվի, որ ընտանիքի անդամներից մեկը բռնության զոհ է։
