ԵՐԵՎԱՆ, 2 նոյեմբերի — Sputnik. Շախմատի Եվրոպայի առաջնությունում այսօր հանգստյան օր է, իսկ վաղը` նոյեմբերի 3-ին, կայանալիք վեցերորդ տուրում Հայաստանի տղամարդկանց հավաքականը կհանդիպի Ադրբեջանի թիմի հետ:
Հինգերորդ տուրից հետո մեր ընտրանին զբաղեցնում է 4-րդ տեղը:
Կանանց հավաքականը Վրաստանին պարտվելուց հետո նահանջել է 13-րդ հորիզոնական և վաղը կխաղա Հունգարիայի թիմի հետ:
Տղամարդկանց առաջնությանը մասնակցում են 39 թիմ։ Հայաստանի հավաքականի կազմում ընդգրկված են Լևոն Արոնյանը, Գաբրիել Սարգսյանը, Սերգեյ Մովսեսյանը, Հրանտ Մելքումյանը, Հովհաննես Գաբուզյանը (մարզիչ՝ Արշակ Պետրոսյան):
Կանանց առաջնությունում խաղում են 32 թիմ։ Հայաստանի հավաքականի կազմում են Էլինա Դանիելյանը, Լիլիթ Մկրտչյանը, Լիլիթ Գալոյանը, Մարիա Կուրսովան, Մարիա Գեւորգյանը, մարզիչը Արթուր Չիբուխչյանն է:
Եվրոպայի թիմային առաջնությունը մեկնարկել է հոկտեմբերի 28-ին և կավարտվի նոյեմբերի 6-ին: Առաջնությունն անցկացվում է Հունաստանում։
