ԵՐԵՎԱՆ, 2 նոյեմբերի — Sputnik. Կարեն Կարապետյանի եղբոր տունը վարչապետի փողերով չի գնվել, իսկ անշարժ գույքը գնելու պահին մոտակայքում ծառեր չեն եղել, այսօր կայացած ասուլիսի ժամանակ ասաց կառավարության ղեկավարը։
Երևանի «Հաղթանակ» զբոսայգու մոտ գնված առանձնատան վերաբերյալ հարցը վարչապետին ուղղվեց այն ժամանակ, երբ նա ներկայացնում էր սոցիալ-տնտեսական վիճակագրության տվյալները։
«Այդ տունը ես չեմ գնել, այլ եղբայրս, ընդ որում` ինքնուրույն է գնել։ Ես սա ընդգծում եմ, որ չասեք` ինքը գնել է, բայց եղբոր անունով է գրանցել։ Գնել է 2011 թվականին Կանադայի ու ԱՄՆ քաղաքացուց: Երբ գնել ենք, այնտեղ անտառ չի եղել, 2014-ին է կառուցվել»,- ասաց Կարապետյանը:
Նա նշեց, որ ինքն էլ այդ տարածքում է մեծացել և շատ լավ է հիշում այդ անտառը։
«Անտառ չկար, տարածքն արդեն վաճառված էր, գնել ենք երկրորդական շուկայից»,- շեշտեց վարչապետը։
Նշենք, որ ավելի վաղ «Երկիր ծիրանի» կուսակցության առաջնորդ Զարուհի Փոստանջյանը հրապարակել էր այդ առանձնատան լուսանկարը և հայտարարել, որ իրենք սկսելու են հանրային տարածքները քաղաքացիներին վերադարձնելու շարժում և գործընթաց։
