ԵՐԵՎԱՆ, 2 նոյեմբերի — Sputnik. Հայտնի դերասան Արմեն Ջիգարխանյանի կինը` Վիտալինա Ցիմբելյուկ-Ռոմանովկայան, առանց քաշվելու մտել է դերասանի նախկին կնոջ` Տատյանա Վլասովայի տուն։ Այս մասին հայտնում է Մոսկովսկի կոմսոմոլեցը։
Վիտալինան այժմ Վրաստանում է, բայց նրանց ընտանեկան ինտրիգներն ու ընտանեկան դրամայի նոր մանրամասները շարունակում են ցնցել հասարակությանը։
Պարբերականը նշում է, որ Ջիգարխանյանի բոլոր գործողությունները` հարցազրույցները, ԶԼՄ-ներում ու սոցցանցերում հրապարակված նյութերը, հիմնականում կեղծ են։
«ՄԿ»-ն պարզել է, որ Ցիմբալյուկ-Ռոմանովսկայան, երբ արդեն Ջիգարխանյանի օրինական կինն է դարձել, իրեն տանտիրուհի է զգացել Ջիգարխանյանի նախկին կնոջ` Տատյանա Վլասովայի տանը։ Նա նույնիսկ փոխել է տան դռան կողպեքը։
«Ըստ էության, Վիտալինայի դեմ քրեական գործ պետք է հարուցվեր դեռ մեկուկես տարի առաջ։ Այս դեպքը տեղի է ունեցել 2016 թվականի հունվարի 28-ին, երբ Վլասովան վերադարձել է Արբատում գտնվող իր տուն։ 74 տարեկան կինը դուրս է եկել վերելակից և իր բնակարանի դիմաց հանդիպել է Վիտալինային ու նրա ծանոթին` Վլադիմիր Պուտինցևին»,- գրում է պարբերականը։
Անկոչ հյուրերը շտապել են արագ հեռանալ, բայց Պուտինցևն ապշահար բնակարանի նոր կողպեքի բանալին ողորմածաբար մեկնել է ապշահար տանտիրուհուն։
Վլասովան դիմել է իրավապահ մարմիններին և պահանջել նրանց քրեական պատասխանատվության ենթարկել ուրիշի բնակարանի անձեռնմխելիությունը խախտելու համար։
Ավելի ուշ Ցիմբալյուկը պատմել է քննիչներին, որ բնակարան է մտել Արմեն Բորիսովիչի խնդրանքով ստուգելու համար` ամեն ինչ կարգին է, թե ոչ, և արդյոք օտար մարդիկ չեն բնակվում այդ տանը։ Նրա խոսքով` հենց այդ ժամանակ էլ կողպեքի հետ կապված խնդիրներ են ծագել, և ստիպված են եղել փոխել կողպեքը։ Ամենայն հավանականությամբ, քննիչին բավարարել է այդ բացատրությունը, որովհետև գործը պահել են խոր պահարանում, գրում է «ՄԿ»-ն։
Ջիգարխանյանը ֆինանսական սկանդալի պատճառով նոյեմբերի 9-ին պաշտոնապես կբաժանվի իր կնոջից` Վիտալինա Ցիմբալյուկ-Ռոմանովսկայայից: Հայտնի է, որ Ցիմբալյուկը լքել է Ռուսաստանը: ԶԼՄ-ների հաղորդումների համաձայն` Ջիգարխանյանի կինն իր մոր հետ մեկնել է Թբիլիսի, սակայն, ամենայն հավանականությամբ, երթուղին ավելի ուշ կփոխվի: Որոշ տեղեկությունների համաձայն` նա կարող է գնալ Կիև, քանի որ Ցիմբալյուկն Ուկրաինայի քաղաքացիություն ունի:
Այժմ Ջիգարխանյանն ապրում է երեք սենյականոց վարձակալած բնակարանում, որը նրան օգնել են գտնել ընկերները:
Արմեն Ջիգարխանյանը և Վիտալինա Ցիմբալյուկ-Ռոմանովսկայան միասին ապրել են ավելի քան տասնհինգ տարի, բայց պաշտոնապես ամուսնացած են միայն մեկուկես տարի։
Հիշեցնենք, որ կնոջ հետ տեղի ունեցած կոնֆլիկտից հետո Ջիգարխանյանը հոկտեմբերի 10-ին հայտնվել էր Մոսկվայի 57-րդ քաղաքային հիվանդանոցում, որտեղ մնաց ավելի քան տասը օր: Հիվանդանոցում նա ասում էր, որ չգիտի, թե ուր է գնալու, քանի որ ամբողջ գույքը վերագրանցել է կնոջ անունով: Այժմ իրավապահ մարմինները հետաքննում են Ջիգարխանյանի անձնագրի գողության փաստը:
