ԵՐԵՎԱՆ, 2 նոյեմբերի – Sputnik, Լաուրա Սարգսյան. Հայաստանը ցանկացած իրավիճակում կշարունակի պահպանել Իրաքի հետ սերտ հարաբերությունները և կողջունի Բաղդադի և Էրբիլի միջեւ բանակցությունները, հայտարարել է Հայաստանի դեմոկրատական կուսակցության նախագահ Արամ Սարգսյանը:
«Ամեն դեպքում, հյուպատոսություն պետք է բացել, քանի որ այնտեղ կա հայկական համայնք»,- ասաց Սարգսյանը:
Միևնույն ժամանակ, փորձագետը նշել է, որ Իրաքի քրդական ռեգիոնալ վարչության ղեկավարի հրաժարականը նախագահի պաշտոնից ակնկալվում էր, քանի որ Բարզանիի լիազորությունների ժամկետը լրացել է նոյեմբերի 1-ին: Այդ օրը պետք է տեղի ունենային նախագահական և խորհրդարանական ընտրություններ, սակայն դրանք անորոշ ժամանակով հետաձգվեցին `տարածաշրջանում ճգնաժամի սրման պատճառով:
«Մինչեւ հանրաքվեն Բարզանին նշել է, որ պաշտոնաթող կլինի նոյեմբերի 1-ին: Նա հավատարիմ մնաց իր խոսքին և լիազորությունների ժամկետի ավարտից հետո պաշտոնաթող եղավ: Դա չի նշանակում, որ Բարզանին քաղաքականությունից հեռանում է», — ասել է Սարգսյանը Sputnik-ի թղթակցի հետ զրույցում:
Թուրք-քրդական հարցերով փորձագետ Կարեն Հովհաննիսյանը նույնպես համոզված է, որ Բարզանիի՝ պաշտոնից հրաժարականը ֆորմալ է և հավասարազոր չէ քաղաքականությունից հեռանալուն:
«Բարզանիի, որը 70 տարեկանն անց է, հրաժարականը կարող է նշանակել, որ նա ցանկանում էր պատմության մեջ մնալ «բարի» առաջնորդ, որը տարավ Քրդստանն անկախության: Բարզանիի կլանը իշխանության մեջ է, ուստի նախկին նախագահը կշարունակի երկիրը կառավարել կուլիսների հետևից»,- ասաց Հովհաննիսյանը։
Փորձագետը չի բացառում, որ Բարզանին Քրդստանի վերջին նախագահը կլինի: Երկիրը խորհրդարանական կառավարման ձևի անցման շեմին է:
Մերձավոր Արևելքի հարցերով քուրդ փորձագետ, սոցիոլոգ Աբաս Վալին Sputnik-ի հետ հարցազրույցում նշել է. Բարզանին պաշտոնից հեռանալու երեք պատճառներ ուներ:
Քրդստանի նախկին նախագահը կորցրել է ԱՄՆ-ի աջակցությունը: Վաշինգտոնը չի աջակցել հանրաքվեին և չի խոչընդոտել Իրաքին ու Խաշդ ալ-Շաաբիի աշխարհազորայիններին Քիրքուքում գործողություն իրականացնել:
«Բարզանին նաև կորցրեց Թուրքիայի աջակցությունը և հայտնվեց մեկուսացված իրավիճակում առանց տարածաշրջանային մակարդակով ակտիվ աջակցության: Քիրքուքում տեղի ունեցած հանրաքվեից և մյուս իրադարձություններից հետո Բարզանիի Քրդստանի Դեմոկրատական կուսակցության (ՔԴԿ) և Քրդստանի հայրենասիրական միության (ՔՀՄ) միջև անջատումն էլ իր դերն ունեցավ»,- ասաց Վալին:
Նա համոզված է, որ Բարզանիի՝ Իրաքի կառավարության ուժերի հետ բախման մեջ մտնելը կհանգեցներ իր իշխանության ոչնչացման: Բարզանին հեռացավ պաշտոնից` կանխելու այս իրավիճակը: Վալին նաև կարծում է, որ Բարզանիի հեռացումը կհանգեցնի տարածաշրջանում ցեղային իշխանության դերի թուլացմանը:
Իրաքի Քրդստանի ինքնավարության անկախության հանրաքվեն տեղի ունեցավ սեպտեմբերի 25-ին: Քրդստանի ընտրությունների և հանրաքվեի ամենաբարձր անկախ հանձնաժողովի տվյալների համաձայն՝ ընտրողների 92,7% —ը քվեարկել է անկախության օգտին:
