ԵՐԵՎԱՆ, 2 նոյեմբերի – Sputnik. Ռուսաստանից մեծ զբոսաշրջային հոսքը խրախուսում է Հայաստանի քաղաքացիներին սովորել ռուսերեն, ասել է Հայաստանի նախագահ Սերժ Սարգսյանը «Ռոսիյսկայա գազետային» տված հարցազրույցում:
Նրա խոսքով՝ ռուսաստանցի զբոսաշրջիկների մեծ թիվը տաքսու վարորդներին, մատուցողներին, սպասարկման ոլորտում աշխատող այլ ներկայացուցիչներին դրդում են ռուսերեն սովորել:
«Ավելի լավ է, երբ լեզվի տարածումը ոչ թե կարգախոս է, այլ քաղաքացիների ցանկություն»,- ասել է Հայաստանի նախագահը:
Սարգսյանն անդրադարձել է նաև ՀՀ կրթության և գիտության նախարարության մշակած ռուսաց լեզվի ուսուցման հայեցակարգի հանրային քննարկմանը: Նախագահը նշել է, որ դա որևէ կերպ կապված չէ Հայաստանի անդամակցությանը ԵԱՏՄ-ին:
«Հայաստանում ռուսաց լեզվին միշտ էլ լավ են վերաբերել, և այն միշտ էլ տարածված է եղել: Ռուսաստանի և Հայաստանի տնտեսությունները կապված են հազարավոր թելերով, մենք շատ սերտ գործակցություն ունենք, և լեզվի իմացությունն, ուղղակի, անհրաժեշտ է»,- հավելել է Սարգսյանը:
Նրա խոսքով՝ այդ դեպքում հիմնական շեշտը անհրաժեշտ է դնել ռուսերենի ուսուցման որակի վրա, քանի որ Հայաստանը միշտ հայտնի է եղել իր ռուս մասնագետներով:
Սարգսյանն ասել է, որ ռուսաց, ինչպես նաև ցանկացած այլ լեզու, հայերի համար «կենդանի հյուսվածք» է:
«Ուստի, պետք է ջանքեր գործադրել, նոր դասավանդման մեթոդներ ներդնել, ավելի հաճախ կազմակերպել կոնֆերանսներ և սեմինարներ ինչպես Հայաստանում, այնպես էլ Ռուսաստանում: Այդ առումով նշանակալի դեր կարող է խաղալ ռուս-հայկական համալսարանը և Մոսկվայի Մ.Վ. Լոմոնոսովի անվան պետական համալսարանի մասնաճյուղը Հայաստանում», — հավելել է Հայաստանի նախագահը:
Սարգսյանն ասել է, որ դեռ վաղ է խոսել հայեցակարգի ընդունման ժամկետների մասին, սակայն այդ գործընթացին ոչինչ չի խանգարում: Ամենայն հավանականությամբ, այն կհաստատվի առաջիկա ամիսներին:
Նա խոստացել է, որ հայեցակարգի ընդունմամբ արմատական փոփոխություններ չեն լինի, քանի որ հայերը միշտ լավ են վերաբերվում ռուսաց լեզվին:
Հայաստանի կրթության և գիտության նախարարությունը մշակել և այս տարվա սեպտեմբերին է հանրային քննարկման է ներկայացրել հայկական դպրոցներում ռուսաց լեզվի իմացության մակարդակի բարձրացման հայեցակարգի նախագիծը:
