Կոնկրետ անդրադարձ ղարաբաղյան հակամարտության ՌԴ, Իրանի և Ադրբեջանի նախագահների հանդիպման ընթացքում չի եղել։ Sputnik Արմենիային հայտնել է իրանագետ Ահարոն Վարդանյանը։ Հակառակ ադրբեջանական լրատվամիջոցների ներկայացման, Իրանի հոգևոր առաջնորդը, Վարդանյանի խոսքով, նույնիսկ որոշ զգուշացումներ է արել Ադրբեջանի նախագահին։
«Խամենեն ասել է, որ Ադրբեջանի բնակչության մեծամասնությունը Իսլամի շիական ուղղության հետևորդ է, ինչպես Իրանում և Իրաքում, և նույնիսկ խորհրդային իշխանության տարիներին, հնարավոր չի եղել Ադրբեջանում արմատախիլ անել շիականությունը։ Այստեղ նա հավանաբար ակնարկում է Ալիևին, որ ինքն էլ չփորձի նույնը անել»,- ասում է Վարդանյանը։
Մեկնաբանելով իրանական լրատվամիջոցների հրապարակումները` Ահարոն Վարդանյանն ասում է, որ Իրանի հոգևոր առաջնորդն իր խոսքում ակնածանքով է խոսել Ադրբեջանում կրոնական ծեսերի ժամանակ տեղի ունեցած բազմամարդ հավաքների մասին` Ալիևին ակնարկելով, որ նույնիսկ Ադրբեջանի իշխանությունների ճնշումների պարագայում այդ երկրի բնակչությունը շարունակում է հավատարիմ մնալ իր կրոնին։
