ԵՐԵՎԱՆ, 1 նոյեմբերի — Sputnik. ՀՀ սննդամթերքի անվտանգության պետական ծառայությունը կասեցրել է Նոյեմբերյանում լիմոնադի արտադրությամբ զբաղվող Ա\Ձ Արամ Ամիրաղյանի արտադրամասը։
Ծառայության ներկայացրած տեղեկատվության համաձայն` իրականացրած վերահսկողության արդյունքում պարզվել է, որ լիմոնադի արտադրամասում խախտվում են սննդամթերքի հիգիենայի գրեթե բոլոր պահանջները:
«Արտադրամասն ապահովված չի եղել անհրաժեշտ տարածքներով և սառնարանային խցիկներով, չեն պահպանվել սննդամթերքի անվտանգության ապահովման պահանջներն ու մակնշման կանոնները` պատրաստի արտադրանքի վրա չի նշվել արտադրման ժամկետը»,-հայտնում է ՍԱՊԾ-ն:
Հայտնաբերված խախտումները հիմք են հանդիսացել Ա/Ձ Արամ Ամիրաղյանի արտադրամասի գործունեությունը կասեցնելու համար։
Տնտեսվարողին ժամանակ է տրվել արձանագրված խախտումները վերացնելու համար։
