ԵՐԵՎԱՆ, 1 նոյեմբերի — Sputnik. Երևանում կառուցվել է տարածաշրջանում ամենաերկար զիփլայնը, որը շուտով շահագործման կհանձնվի։ Այս մասին հայտնում է Երևանի քաղաքապետարանի մամուլի ծառայությունը։
Երևանի «Արաբկիր» զբոսայգում կառուցված զիփլայնն ամենաերկարն է տարածաշրջանում։ Այն ունի երկու ուղղություն՝ Արաբկիրից դեպի Աջափնյակ վարչական շրջան՝ շուրջ 870 մ, և Աջափնյակից Արաբկիր՝ 650 մ: Զիփլայնի բարձրությունը 87 մետր է, դրա մի հատվածն անցնում է Դավթաշենի կամրջի տակով:
Զիփլայնից բացի, զբոսայգում նախատեսվում է ունենալ նաև ժայռագնացության, լեռնային հեծանիվների, յոգայի համար նախատեսված հատվածներ, ինչպես նաև գրադարան, բացօթյա կինոթատրոն և նկարչության համար հատուկ վայրեր:
Այգին կունենա նաև փոքրիկների համար խաղահրապարակներ և ապրիլյան քառօրյա պատերազմում զոհված հայորդիների հիշատակը հավերժացնող հուշարձան:
Այգու բարեկարգման համար ծախսվել է շուրջ 80 մլն դրամ, և կծախսվի ևս 45-50 մլն դրամ։ Նախագիծն ամբողջությամբ նախատեսվում է ավարտել 2018թ. վերջին, բայց տարածաշրջանի ամենաերկար զիփլայնը շահագործման կհանձնվի արդեն մոտ ապագայում:
«Արաբկիր» զբոսայգու բարեկարգումն իրականացնում է «Գրին սմայլ» ընկերությունը` քաղաքապետարան-մասնավոր համագործակցության ձևաչափով։
