ԵՐԵՎԱՆ, 31 հոկտեմբերի — Sputnik. Ադրբեջանը կարող է Եվրասիական զարգացման բանկի մասնակից դառնալ, այսօր Մոսկվայում «Եվրասիական ինտեգրացիա» միջազգային համաժողովի ժամանակ լրագրողներին ասաց Եվրասիական զարգացման բանկի վարչության նախագահ Դմիտրի Պանկինը։
«Ես եղել եմ Ադրբեջանում, հանդիպել ֆինանսների նախարարի հետ, քննարկել այն հնարավոր նախագծերը, որոնցում կարող են համընկնել մեր շահերը, օրինակ` Կասպից ծովով տրանսպորտային փոխադրումներ, Ռուսաստանի հետ տրանսպորտային կապեր»,- ասաց Պանկինը։
Նրա խոսքով` սարսափելի ոչինչ չի լինի, եթե Ադրբեջանը միանա Եվրասիական բանկի նախագծերին։
Բանն այն է, որ Եվրասիական զարգացման բանկը նման չէ ԵԱՏՄ-ին, քանի որ ԵԶԲ-ում ընդգրկված է նաև Տաջիկստանը։
«Ես սարսափելի ոչինչ չեմ տեսնում, որ և՛ Հայաստանը, և՛ Ադրբեջանը լինեն ֆինանսական նույն ինստիտուտում։ Կյանքը շարունակվում է, և պետք է շփման եզրեր գտնել»,- ասաց Պանկինը։
Եվրասիական զարգացման բանկը հիմնադրել են Ռուսաստանի Դաշնությունն ու Ղազախստանի Հանրապետությունը 2006 թվականի հունվարի 12-ին ստորագրված պայմանագրի հիման վրա: 2009 թվականին բանկին են միացել Հայաստանը և Տաջիկստանը: 2010 թվականին միացել են նաև Բելառուսի Հանրապետությունը, իսկ 2011 թվականին` Ղրղըզստանի Հանրապետությունը: Յուրաքանչյուր մասնակից պետություն բանկի խորհրդում նշանակում է իր իրավասու ներկայացուցչին և նրա տեղակալին:
