2018թ–ին սոցիալական ծախսերը չավելացնելու կառավարության մարտավարությունը ԱԺ ֆինանսաբյուջետային հարցերի հանձնաժողովի քարտուղար Խոսրով Հարությունյանը ճիշտ է համարում։ «Կառավարությունն ասում է` մենք ունենք սոցիալական պարտավորություններ` կենսաթոշակ բարձրացնել, աշխատավարձ բարձրացնել, սոցիալական այլ խնդիրներ լուծել։ Բայց ես այդ խնդիրներն ավելի երաշխավորված կարող ենք իրականացնել միայն այն դեպքում, երբ կունենանք բյուջետային եկամուտների ավելացման անշրջելի տնտեսական երաշխիքներ։ Քանի դեռ ես այդպիսի խնդիրներ չեմ լուծել, ես զերծ կմնամ հավելյալ խնդիրներ վերցնելուց»,– ասում է Հարությունյանը։
Համաշխարհային տնտեսական կանխատեսումները դրական են, հիշեցնում է Խոսրով Հարությունյանը` հավելելով, որ այդ պայմաններում վերցված պետական պարտքը պետք է ծառայի ոչ թե սոցիալական նպատակներին, այլ տնտեսական։ Իսկ երբ դրա արդյունքում կառավարությանը կհաջողվի սեփական եկամուտներ ապահովել, դրանից հետո կարելի կլինի մտածել նաև սոցիալական ծախսերն ավելացնելու մասին։
Ըստ Խոսրով Հարությունյանի, հենց այս փիլիսոփայությունն է դրված նաև 2018թ–ի պետական բյուջեի նախագծի հիմքում։
