ԵՐԵՎԱՆ, 30 հոկտեմբերի — Sputnik. Մոսկվայի հետ 100 միլիոն դոլարի նոր վարկի տրամադրման վերաբերյալ համաձայնագիրը Երևանը կարող է ստորագրել մինչև Ամանոր: ՌԻԱ Նովոստիին հայտնում է, որ այս մասին տեղեկացրել է ՌԴ-ում Հայաստանի դեսպան Վարդան Տողանյանը:
«Հայաստանի կառավարությունը հավանություն է տվել համաձայնագրին: Ստորագրման հստակ օր դեռ չկա: Բայց ես հույս ունեմ, որ դա տեղի կունենա մինչև Ամանոր», — ասաց նա:
Հայաստանի կառավարության` հոկտեմբերի 12-ին հաստատած որոշման համաձայն` Ռուսաստանը հայկական կողմին վարկ կտրամադրի ռուսական ռազմական արտադրանքի մատակարարումը ֆինանսավորելու համար:
Վարկը կտրամադրվի 15 տարվա մարման ժամկետով `տարեկան 3% տոկոսադրույքով: Օգտագործման ժամկետը` 2018-ից մինչև 2022 թթ.:
Կառավարության որոշման մեջ նշվում է, որ Հայաստանը պետք է վարկն օգտագործի արտադրանքի մատակարարման յուրաքանչյուր պայմանագրի արժեքի 90% —ի չափով: Միևնույն ժամանակ, որպես կանխավճար, հայկական կողմը ստիպված կլինի վճարել պայմանագրի արժեքի առնվազն 10% —ը:
Համաձայնագիրը, ինչպես նշված է փաստաթղթում, ուղղված է երկու երկրների միջև բարեկամական հարաբերությունների հետագա ամրապնդմանը:
Ավելի վաղ պաշտպանության նախարար Վիգեն Սարգսյանը հայտարարել էր, որ 200 մլն դոլարի առաջին ռուսական վարկի ռազմական մատակարարումները կավարտվեն մինչև 2017 թվականի վերջը: Վարկի վերաբերյալ փաստաթուղթը ստորագրվել էր դեռ 2015 թ. հունիսի 25-ին, սակայն ուժի մեջ է մտել 2016 թ. փետրվարի 10-ից: Ավելի վաղ հաղորդվել էր, որ Երևանը բանակցում է նոր վարկի համար:
