ԵՐԵՎԱՆ, 30 հոկտեմբերի – Sputnik. Արմավիրի «Մանուշակ» մանկապարտեզում այս պահին մնում են պատանդառուն, պատանդառված 3 տարեկան երեխան և պատանդառուի հետ բանակցող ոստիկանները` փոխոստիկանապետ Հունան Պողոսյանի գլխավորությամբ։ Այս մասին քիչ առաջ լրատվամիջոցներին հայտնեց ՀՀ ոստիկանության ԶԼՄ-ների հետ կապի, վերլուծության և լրատվության բաժնի աշխատակից Մարտուն Սիմոնյանը։
«Պարզվել է, որ տղամարդը 3-ամյա մի տղայի հետ առանձնացել է սենյակներից մեկում և պահանջներ է ներկայացնում»,- լրագրողներին հայտնեց Ջանոյանը` չմանրամասնելով, թե կոնկրետ ինչ է պահանջել պատանդառուն։
«Վարչական բնույթի պահանջներ։ Քննության շահերից ելնելով` պահանջների մասին կհայտնենք ավելի ուշ»,- ասաց նա։
Ինչ վերաբերում է նախապես մանկապարտեզում պատանդառված մյուս երեխաներին ու աշխատակիցներին, Սիմոնյանը հայտնեց, որ դեպքի վայր ժամանած ոստիկաններն ապահովել են վերջինների անվտանգ դուրս գալը մանկապարտեզից։
Սիմոնյանը մեկնաբանեց նաև պատանդառուի նախկին կնոջ` մանկապարտեզի դաստիարակչուհու և զոքանչի` մանկապարտեզի վարիչի վիրավոր լինելու մասին տեղեկությունը։ Ըստ նրա` ոստիկանությունը հիվանդանոցից որևէ քաղաքացու մարմնական վնասվածք ստանալու մասին ահազանգ չի ստացել։
Այդուհանդերձ, նա չժխտեց նաև, որ մանկապարտեզի տարածք պատգարակ է տարվել, բայց և չհստակեցրեց, թե ում համար։
«Եթե առաջին օգնություն ցույց տային, դուրս կբերեին, այսքան երկար առաջին օգնություն չեն ցույց տա»,- դեպքի վայրում աշխատող լրագրողների հարցերին ի պատասխան ասաց նա։
Ի դեպ, մանկապարտեզի բակում հավաքված անձինք լրագրողների հետ զրույցում հերքում են ոստիկանության ներկայացուցչի հայտարարությունները` նշելով, որ իրենց բարեկամ-հարազատներն այս պահին էլ շարունակում են մնալ մանկապարտեզում։
