ԵՐԵՎԱՆ, 30 հոկտեմբերի — Sputnik. ՀՀ տնտեսությունն աճում է և մեծացնում իր ներկայացվածությունը ՀՆԱ-ի կազմում, այսօր ԱԺ-ում 2018 թ. պետական բյուջեի նախագծի ներկայացման ժամանակ ասաց ֆինանսների նախարար Արամյանը՝ վստահեցնելով, որ տնտեսական այս սցենարը կառավարությունը պահելու է նաև առաջիկա տարիներին, ինչը թույլ է տալու ապահովել պարտք- ՀՆԱ ցուցանիշի 1% նվազում:
Բյուջեի պակասուրդը կառավարությունը մտադիր է լրացնել կապիտալ ծախսերի հաշվին:
«Մենք ունենք չօգտագործված պոտենցիալ թե՛ կապիտալի, թե՛ աշխատուժի առումով, որը պետք է անպայման օգտագործել»,- ասաց Արամյանը:
Բյուջեի պակասուրդը հաջորդ տարի կկազմի 156,5 մլրդ, եկամուտները՝ 1 տրլն 307 մլրդ, ծախսերը՝ 1 տրլն 464 մլրդ, իսկ գնաճը 2018 թ.-ին կառավարությունը հաշվարկել է 4%-ի սահմաններում:
«Եթե ուշադրություն դարձնեք՝ ծախսերն ու եկամուտներն աճում են, իսկ պակասուրդը մ 2017 թ.-ի համեմատ մնում է զսպված»,- ասաց Արամյանը:
Առկա պակասուրդը կառավարությունը մտադիր է լրացնել հիմնականում ներքին միջոցների հաշվին՝ պարտք-ՀՆԱ ցուցանիշը 2018-ին նվազեցնելով, ներկա 43%- փոխարեն, 41-ի:
«Մենք շարունակելու ենք մնալ նվազ պարտքի բեռ ունեցող երկրների ցանկում»,- հայտարարեց Արամյանը։
Նա հավելեց, որ առավելագույն պարտքն աշխարհում ընդունված է համարել պարտք- ՀՆԱ ցուցանիշի 48%-ը:
