ԵՐԵՎԱՆ, 29 հոկտեմբերի — Sputnik. Հայաստանը կրկին պետք է ավիացիոն հզոր պետություն դառնա, Sputnik Արմենիային ասաց ԽՍՀՄ քաղավիացիայի փոխնախարար, ԽՍՀՄ վաստակավոր օդաչու, «Քաղավիացիայի գործընկեր» ռուսական հիմնադրամի ղեկավար Օլեգ Սմիրնովը:
Նրա խոսքով` խորհրդային տարիներին Հայաստանի քաղավիացիան ծաղկման շրջան ապրեց:
«Ես քաջածանոթ էի ձեր երկրի քաղավիացիային: Առանց չափազանցնելու` Հայաստանը հզոր ավիացիոն հանրապետություն էր: Կրկին պետք է նման տերություն դառնալ», — ասաց Սմիրնովը:
Նրա խոսքով` «Զվարթնոցի» փոխարեն հետամնաց օդանավակայան էր, որը շուտով վերածվեց «դղյակի»։ Սմիրնովը` որպես օդաչու, հարյուրավոր թռիչքներ է կատարել այդ օդանավակայանում: Ասում է` հիանալի օդանավակայան էր` հրաշալի սարքավորումներով:
Նրա խոսքով` «Ազգային ավիացիոն միավորում» ԿՀ-ի ղեկավար, ԽՍՀՄ վաստակավոր օդաչու Դմիտրի Ադբաշյանի շնորհիվ Հայաստանը ԽՍՀՄ հազվագյուտ հանրապետություններից էր, որը Իլ-86 էր շահագործում: Հենց Ադբաշյանն առաջինը նստեց Իլ-86-ի ղեկին:
Սմիրնովը նշեց, որ պետք է հնարավոր ամեն բան անել խորհրդային տարիների քաղավիացիայի զարգացման մակարդակը վերականգնելու համար:
