ԵՐԵՎԱՆ, 28 հոկտեմբերի — Sputnik. Երկու ավտոմեքենայով, որից մեկը կարմիր «Մերսեդես Բենց», մյուսը` սպիտակ «Նիվա Ուրբան» մակնիշի, մեծ խումբ անսթափ մարդիկ շրջապատել են հենակետը և ծեծի ենթարկել ծառայությունն իրականացնող «Պանտերա Սիքյուրիթիի» պահնորդներին, հայտնում է մի քանի ամիս առաջ «Դիլիջան» ազգային պարկի պահպանությունը ստանձնած ընկերությունը։
«Նրանք պահանջել են լքել «իրենց տարածքը»։ Պահնորդները հասցրել են ահազանգել վերադասին, որն էլ դիմել է ոստիկանությանը։ Ի պատիվ վերջիններիս, արձագանքը շատ արագ է եղել»,- ասված է ընկերության տարածած հաղորդագրության մեջ։
Սկսվել է քննություն և օպերատիվ գործողություններ։
«Գողն ուզում է ուժով և պարտադրաբար ստիպել մեզ նահանջել մեր բռնած ազնիվ ուղուց»,- հայտարարում է պահնորդական ընկերությունը՝ հավելելով, որ ինչ էլ լինի՝ չի նահանջելու իր ստանձնած պարտականությունները կատարելու ուղուց։
Հիշեցնենք, հոկտեմբերի 13-ին բնապահպանության նախարար Արծվիկ Մինասյանի այցի ժամանակ, երեկոյան 21։00-ի սահմաններում ազգային պարկի Շամախյան տեղամասում անհայտ անձինք հարձակում էին գործել և հրկիզել «Պանտերա» ընկերությանը պատկանող անվտանգության աշխատակիցների տնակը։
Ավելի ուշ հայտարարվեց, որ բացահայտվել է մեղավորների ինքնությունը, կան նաև ձերբակալվածներ։
