ԵՐԵՎԱՆ, 28 հոկտեմբերի — Sputnik. Արցախի ԱԳՆ —ն հանդես է եկել Կատալոնիայի մասին հայտարարությամբ, տեղեկացնում է Արցախի արտաքին գործերի նախարարության պաշտոնական կայքը։
Հայտարարության մեջ, մասնավորապես, ասվում է.
«Անհերքելի է Կատալոնիայի ժողովրդի՝ իր քաղաքական կարգավիճակը ժողովրդավարական կամարտահայտության միջոցով ինքնուրույն որոշելու իրավունքը։
ՄԱԿ-ի մի շարք հիմնարար փաստաթղթերի համաձայն՝ միջազգային հանրությունը հանձնառություն է ստանձնել խրախուսելու ժողովուրդների ինքնորոշման իրավունքի իրացումը և հարգել այդ իրավունքը։
Կարևոր ենք համարում, որ Բարսելոնայի և Մադրիդի միջև քաղաքական ճգնաժամի հանգուցալուծումը գտնվի բացառապես խաղաղ միջոցներով և երկխոսության ճանապարհով»։
Արցախի արտգործնախարարությունը հիշեցրել է, որ հենց Ադրբեջանի հրաժարվելը՝ ճանաչել Արցախի ժողովրդի ինքնորոշման իրավունքը, և պաշտոնական Բաքվի կողմից քաղաքական հարցերի լուծման համար ուժային մեթոդների կիրառումը ադրբեջանա-արցախյան հակամարտությունը տեղափոխեցին ռազմական հարթություն։
