ԵՐԵՎԱՆ, 26 հոկտեմբերի — Sputnik. Ռուսաստանը ողջունում է Հայաստանի և Ադրբեջանի` Լեռնային Ղարաբաղի հակամարտության կարգավորման շուրջ բանակցային գործընթացը շարունակելու պատրաստակամությունը: Այդ մասին հինգշաբթի ճեպազրույցում հայտարարել է ՌԴ ԱԳՆ տեղեկատվության և մամուլի վարչության տնօրեն Մարիա Զախարովան:
«Մենք ողջունում ենք կողմերի` բանակցային գործընթացը խորացնելու և շփման գծում լարվածության նվազեցման ուղղությամբ լրացուցիչ քայլեր ձեռնարկելու պատրաստակամությունը: Մենք սատարում ենք ԵԱՀԿ Մինսկի խմբի համանախագահներին, որոնք այժմ աշխատում են Հայաստանի և Ադրբեջանի արտգործնախարարների հաջորդ հանդիպման անցկացման ուղղությամբ` քննարկելու համար կարգավորման հիմնարար հարցերը և իրավիճակի կայունացման հնարավոր միջոցները», — նշել է նա:
«Մենք կոչ ենք անում Բաքվին և Երևանին կառուցողական մոտեցում ցուցաբերել չլուծված խնդիրները լուծելու համար», — ընդգծել է Զախարովան:
Հայաստանի նախագահ Սերժ Սարգսյանը և Ադրբեջանի նախագահ Իլհամ Ալիևը հոկտեմբերի 16-ին Ժնևում բանակցություններ են անցկացրել ԵԱՀԿ Մինսկի խմբի համանախագահների նախաձեռնությամբ և քննարկել են Լեռնային Ղարաբաղի հակամարտության կարգավորման հարցը: ԵԱՀԿ Մինսկի խմբի համանախագահները հայտարարել են, որ Սարգսյանի և Ալիևի հանդիպումն անցել է կառուցողական մթնոլորտում:
Ժնևում ընդունվել է ԵԱՀԿ Մինսկի խմբի համանախագահների, Հայաստանի և Ադրբեջանի արտգործնախարարների համատեղ հայտարարությունը: Նախագահները պայմանավորվել են միջոցներ ձեռնարկել «լարվածությունը նվազեցնելու համար»: Հանդիպումից մի քանի օր անց առաջնագծում Արցախի Պաշտպանության բանակի զինծառայող սպանվեց դիպուկահարի կրակոցից:
