ԵՐԵՎԱՆ, 26 հոկտեմբերի — Sputnik. Արդեն 2 տարի է, ինչ Ջազի հայկական ասոցիացիան կազմակերպում է «Yerevan Jazz Fest» ամենամյա միջազգային փառատոնը։ Այս տարվա միջոցառման շրջանակում արդեն Հայաստան են ժամանել հայտնի երաժիշտներ Ռուսաստանից, Անգլիայից, ԱՄՆ-ից, Ֆրանսիայից, Վրաստանից և այլն։ Իսկ հատուկ ուշադրության արժանանում են հյուրերից երկուսը` մեգաաստղեր Մարկուս Միլլերը և Գոնսալո Ռուբալկաբան։ Միլլերն այսօր լրագրողների հետ զրույցում ասաց, որ ջազն իր կյանքում առանձնակի նշանակություն ունի։
«Ջազը թույլ է տալիս ինձ հաղորդակցվել մարդկանց հետ։ Ջազ երաժշտի համար մեծագույն ձեռքբերումն այն է, երբ կարողանում ես 3 նոտա նվագել, և այդ 3 նոտայի նվագելու ընթացքում մարդիկ ճանաչում են, թե ով է նվագում։ Չգիտեմ` 3 նոտայով կստացվի ինձ մոտ, թե՞ ոչ, բայց 5 նոտայով կնվագեմ»,- ասաց նա։
Հայկական ջազին դեռ ծանոթ չէ, բայց հուսով է, որ Հայաստանում գտնվելու ժամանակ կհասցնի գոնե մասամբ ծանոթանալ։
Ի դեպ, Մարկուս Միլլերն արժանացել է «Գրեմմի» մրցանակի։ Նրան համարում են մարդ-նվագախումբ։ Նա պրոդյուսեր է, բազմաթիվ երաժշտական գործիքների վարպետ, կոմպոզիտոր, գործիքավորող, երգարվեստի կենդանի լեգենդ։
Ջազի փառատոնի կարևորությունը հատուկ գնահատեց հայտնի ջազմեն Լևոն Մալխասյանը։ Նրա խոսքով` ջազը միշտ մոդայիկ է, այն քաղաքականության հետ կապ չունի, քանի որ ինքն իրենով արդեն քաղաքականություն է։
«Իսկ փառատոները կարևոր են, քանի որ ջազմեններն իրար հետ շփվում են, կապեր հաստատում, դա չի կարող չլիցքավորել մեր ջազմեններին, չդառնալ քաղաքային տոն։ Ամեն տարի աշխարհահռչակ ջազմեն Հերբի Հենքոքը հեռագիր է ուղարկում մեր ասոցիացիային` շնորհակալություն հայտնելով, որ ամեն տարի անցկացնում եք միջազգային ջազի օր, դա չի կարող անհետևանք անցնել»,-ասաց Մալխասը։
«Yerevan Jazz Fest 2017»-ը նվիրված է հայտնի «Zilidjan» բրենդի հիմնադիր Ավեդիս Զիլիդջյանին, որը սկիզբ է դրել համաշխարհային ճանաչում ունեցող հարվածային գործիքների` ծնծղաների արտադրությանը։
«Yerevan Jazz Fest 2017»-ը երևանցիների համար իսկական տոն կապահովի հոկտեմբերի 26-ից նոյեմբերի 3-ը։
