ԵՐԵՎԱՆ, 25 հոկտեմբերի — Sputnik. Ինձ համար այս իշխանությունը բանակում չծառայած մարդկանց իշխանություն է, այսօր Աժ-ում, «Զինվորական ծառայության և զինծառայողի կարգավիճակի մասին օրենքի» նախագծի քննարկման ժամանակ հայտարարեց «Ելք» դաշինքի պատգամավոր Էդմոն Մարուքյանը` հավելելով, որ իշխանական բարձունքների են հասել մարդիկ, որոնք բանակում չեն ծառայել։
«Դուք մի անգամ հպարտությամբ նշեցիք, որ 3 բուհ եք ավարտել, հետո եք ծառայել։ Ես շատ լավ գիտեմ ձեր կենսագրությունը, դուք փայլուն կարիերա եք արել։ Չեք կարծո՞ւմ, որ եթե դուք բանակ գնայիք 18 տարեկանից ու այդ երեք բուհը չավարտեիք, այդ կարիերան գուցե և չանեիք»,- դիմելով պաշտպանության նախարար Վիգեն Սարգսյանին` ասաց Մարուքյանը։
«Ես չեմ կարծում, որ եթե 18 տարեկանում զորակոչվեի, իմ հետագա ուսումը կդադարեցնեի։ Իմ ընտանիքում բոլորը ունեն առնվազն մեկ բարձրագույն կրթություն և մեր ընտանիքում դա ավանդույթ է եղել։ Ես միշտ համարել եմ, որ բանակը էլեմենտ է մարդու կայացման համար»,- ընդդիմադիր պատգամավորին պատասխանեց նախարարը։
Իսկ ինչ վերաբերում է իշխանավորների ծառայել-չծառայելու հարցին, Սարգսյանը նշեց, որ Մարուքյանը մասնակի է նայում խնդրին, ապա բերեց ՀՀ նախագահ, գլխավոր գերագույն հրամանատար Սերժ Սարգսյանի օրինակը` ընդգծելով, որ նա ԼՂ անկախության պայքարի ու երկրի զինուժի կայացման ակունքներում կանգնած անձնավորություն է։
Նշենք, որ ՀՀ պաշտպանության նախարարը 2000-2003 թթ-ին ծառայել է ՀՀ զինված ուժերում, եղել է ՀՀ պաշտպանության նախարարի ռեֆերենտ։
