ԵՐԵՎԱՆ, 25 հոկտեմբերի — Sputnik. Եվրասիական միության երկրների տնտեսությունների մրցունակության բարձրացումն անհնար է առանց պետական ծառայությունների էլեկտրոնային կառավարման: Այս մասին այսօր հայտարարել է ՀՀ վարչապետ Կարեն Կարապետյանը Եվրասիական տնտեսական միության միջպետական խորհրդի ընդլայնված նիստում:
«Պարզ է, որ այս խնդիրը լուծելու համար հարկավոր է առաջ շարժվել` հաշվի առնելով, թե տնտեսություններն ինչ հնարավորություններ ունեն այդ փոփոխությունները կատարելու համար` առանց բիզնեսի համար ավելորդ ծախսերի», — ասաց Կարապետյանը:
Երկրորդ թեման, որին անդրադարձավ Կարապետյանը, ԵԱՏՄ անդամ պետություններում համակարգված տրանսպորտային քաղաքականության հիմնական ուղղությունների իրականացման ճանապարհային քարտեզն էր:
«Մեզ համար, Եվրասիայի երկրների հետ ընդհանուր սահմանների բացակայության դեպքում, կապի խնդիրները ավելի քան արդիական են։ Ակնկալում ենք, որ ճանապարհային քարտեզի իրականացումը կնպաստի մեր երկրների միջև տրանսպորտային հաղորդակցման դիվերսիֆիկացմանը», — ասաց վարչապետը:
ԵԱՏՄ-ի ընդհանուր էներգետիկ շուկայի ձևավորման շրջանակում, ըստ Կարապետյանի, Հայաստանը շահագրգռված է էլեկտրաէներգիայի փոխադարձ առևտրի աճով:
Նա նաև նշեց, որ հաջորդ տարի Հայաստանում նախատեսվում է անցկացնել Եվրասիական շաբաթ: Նրա խոսքով, նման միջոցառումները նպաստում են պետությունների և գործարարների միջև երկխոսությանը:
Եվրասիական միջկառավարական խորհրդի նիստում քննարկվեցին տարբեր հարցեր, այդ թվում` Եվրասիական տնտեսական միության գործունեության գործնական ասպեկտները:
Ռուսաստանի, Հայաստանի, Բելառուսի, Ղազախստանի և Ղրղըզստանի կառավարությունների ղեկավարները քննարկեցին Միության մաքսային տարածքում ապրանքների ապօրինի շրջանառության դեմ համալիր միջոցներ ձեռնարկելու հարցը:
Հատուկ ուշադրություն հատկացվեց ինտեգրման կոնկրետ ուղղությունների զարգացմանը` նավթի, գազի և էլեկտրաէներգիայի միասնական շուկաների ձևավորում, ինչպես նաև «ճանապարհային քարտեզ»` միության երկրների տրանսպորտային քաղաքականությունն իրականացնելու համար:
ԵԱՏՄ-ն Մաքսային միության և ընդհանուր տնտեսական տարածքի հիման վրա ստեղծված ինտեգրացիոն տնտեսական միություն է: Գործում է 2015 թ. հունվարի 1-ից: ԵԱՏՄ-ի անդամներն են Ռուսաստանը, Հայաստանը, Բելառուսը, Ղազախստանը և Ղրղըզստանը:
