ԵՐԵՎԱՆ, 25 հոկտեմբերի — Sputnik, Նելլի Դանիելյան. Ռուսաստանը ստեղծել է միջգերատեսչական խմբեր՝ վերահսկելու մեր երկրից ՌԴ արտահանվող գյուղատնտեսական ապրանքների, մասնավորապես, լոլիկի իրական ծագումը։
Այդ մասին այսօր հայտարարել է ՌԴ մաքսային ծառայության պետի տեղակալ Ռուսլան Դավիդովը։ Նա հայտնել է, որ որոշում է կայացվել ստուգել մեր երկրում աճող լոլիկի իրական ծավալն ու այն համադրել ՌԴ արտահանվող խմբաքանակի հետ։
«Մենք ստեղծել ենք միջգերատեսչական աշխատանքային խմբեր, որոնք պետք է մեկնեն տվյալ երկիր, դիտարկեն տեղի արտադրական հզորությունները, ցանքատարածությունները և հաշվարկեն արտադրողականությունը։ Արդյունքում կստացվի հնարավոր արտահանումների ընդհանուր պատկերը»,– ասել է Դավիդովը։
Հայաստանի ագրարագյուղացիական միության նախագահ Հրաչյա Բերբերյանը դժվարացավ ասել՝ Հայաստանից արտահանվող լոլիկի խմբաքանակի մեջ թուրքական լոլիկ կա թե ոչ։ Փոխարենը կարծիք հայտնեց, որ խնդիրը իրավական մակարդակում է։
Նրա խոսքով՝ Հայաստանում գործող սերտիֆիկացման ընթացակարգերն այնքան էլ վստահելի չեն։ Գյուղարտադրանքի ծագումնաբանական ST1 ստանդարտի փաստաթուղթն այսօր արտադրողներին ու արտահանողներին տրամադրում է ՀՀ Առևտրաարդյունաբերական պալատը, մինչդեռ, Բերբերյանն առաջարկում է այդ գործառույթը հանձնել համայնքներին կամ ֆերմերային ասոցիացիաներին։
«Նրանք հենց տեղում արտադրողին կտրամադրեն մակնշումը, որի վրա նշված է լինում ծագման ոչ միայն երկիրը, այլև կոնկրետ վայրը։ Քարտեզի վրա նկարված կետը ցույց է տալիս, թե Հայաստանի կոնկրետ որ վայրում է աճեցվել տվյալ լոլիկը»,– ասաց նա։
Միաժամանակ, Հրաչ Բերբերյանը կեղծարարների նկատմամբ պատիժները խստացնելու կողմնակից է։ Նրա խոսքով՝ ինչպես ցանկացած այլ կեղծիք, այնպես էլ լոլիկի ծագման մասին փաստաթղթերի կեղծումը պետք է պատժվի օրենքի ամբողջ խստությամբ։
«Հենց առաջին 1-2 դեպքերը պատժվեն, մյուսները նման բան այլևս չեն անի»,– կարծում է Բերբերյանը։
Հիշեցնենք, որ ՌԴ–ն 2016 թ.–ի հունվարի 1-ից էմբարգո էր հայտարարել Թուրքիայից ներկրվող մի շարք ապրանքների նկատմամբ։ Ավելի ուշ սահմանափակումները մասնակի վերացվեցին, բայց լոլիկի ներկրման արգելքը մինչ օրս գործում է։
Ռուսական կողմի բազմիցս արտահայտած մտահոգությանը, թե Հայաստանի տարածքով ռուսական շուկա է ներկրվում թուրքական ծագմամբ լոլիկ, ՀՀ պատասխանատու պաշտոնյաները պարբերաբար հերքում են։
