ԵՐԵՎԱՆ, 25 հոկտեմբերի — Sputnik. ԵԱՏՄ երկրները պետք է արագացնեն ապրանքների մակնշման ներդնումը, այդ մասին այսօր Երևանում ԵԱՏՄ միջկառավարական նիստի ընթացքում ասաց ՌԴ վարչապետ Դմիտրի Մեդվեդևը։
Նրա խոսքով` ապրանքների մակնշումը «ոչ թափանցիկ» սխեմաների կանխարգելման արդյունավետ մեխանիզմներից մեկն է, ինչպես ցույց է տվել վերջին տարիների պրակտիկան։
«Անհրաժեշտ է արագացնել համաձայնագրի նախագծի վերաբերյալ ներքաղաքական ընթացակարգերը, որոնք թույլ կտան կիրառել մակնշումը տարբեր ապրանքների նկատմամբ։ Դա կառողջացնի շուկան և կօգնի պայքարել կեղծած ապրանքների դեմ»,– ասաց Մեդվեդևը։
ԵՏՀ կոլեգիայի նախագահ Տիգրան Սարգսյանն, իր հերթին, լրագրողների հետ զրույցում ասաց, որ դա հիմնարար և կարևոր թեմա է։
«Ստվերային շրջանառության հետ պայքարելու համար երկրները մակնշման համակարգ են կիրառում։ Ազգային համակարգերը խնդիրներ են առաջացնում բիզնեսի համար»,– ասաց Սարգսյանը։
Նրա խոսքով` բիզնեսի համար պատնեշների և սահմանափակումների ձևավորումից խուսափելու համար անհրաժեշտ է պայմանավորվել մակնշման միասնական կանոնների վերաբերյալ, միաժամանակ, չոտնահարելով ազգային կառավարությունների շահերը։
Նա նշեց, որ ազգային կառավարությունները մակնշման նոր համակարգեր ներդնելու վերաբերյալ որոշումներ կայացնելիս այդ մասին կտեղեկացնեն ԵՏՀ–ին, որից հետո հարցը կքննարկվի բոլոր երկրների մակարդակով։
«Բոլոր ազգային կառավարություններին հնարավորություն է տրվում երեք ամսվա ընթացքում արձագանքել այդ առաջարկին։ Եթե բոլոր երկրներն իրենց համաձայնությունը տան, մենք կարող ենք որոշում կայացնել միասնական մակնշման վերաբերյալ, սակայն, եթե երեք ամսվա ընթացքում այս կամ այն կողմը չհամաձայնի միանալ, ապա դիմող երկիրն ապրանքների մակնշման սեփական ազգային ծրագիրն ինքնուրույն իրականացնելու իրավունք ունի»,– նշեց Սարգսյանը։
Միջկառավարական խորհրդի նիստում ուսումնասիրվեց ընդլայնված օրակարգը, որը ներառում էր ԵԱՏՄ գործունեության գործնական կողմերը։
Ռուսաստանի, Հայաստանի, Բելառուսի, Ղազախստանի և Ղրղըզստանի կառավարության ղեկավարները քննարկեցին միության մաքսային տարածքում ապօրինի ապրանքաշրջանառությանը հակազդելուն ուղղված համալիր միջոցները։
Առանձին ուշադրություն դարձվեց ինտեգրման ճյուղային ուղղությունների զարգացմանը. նավթի, գազի և էլեկտրաէներգիայի միասնական շուկաների ձևավորում։
ԵԱՏՄ–ն միջազգային ինտեգրացիան միավորում է, որը ստեղծվել է Մաքսային միության և Միասնական տնտեսական տարածքի հիման վրա, գործում է 2015 թվականի հունվարի 1–ից։ Միությունը ստեղծված է ԵԱՏՄ երկրներում ծառայությունների, ապրանքների, կապիտալի և աշխատուժի ազատ տեղաշարժումն ապահովելու նպատակով։ ԵԱՏՄ անդամ են Ռուսաստանը, Հայաստանը, Բելառուսը, Ղազախստանն ու Ղրղըզստանը։
