ԵՐԵՎԱՆ, 25 հոկտեմբերի–Sputnik. «Ծառուկյան» խմբակցության պատգամավոր Կարինե Պողոսյանը ԱԺ–կառավարության հարցուպատասխանի ժամանակ հարցրեց` գործազրկության նպաստները երեք տարի առաջ դադարեցնելուց հետո գործազուրկներից քանի՞ հոգի է աշխատանքով ապահովվել։
ՀՀ աշխատանքի և սոցիալական հարցերի նախարար Արտեմ Ասատրյանը նշեց, կառավարությունն ակտիվ ծրագրեր է իրականացնում աշխատաշուկայում անմրցունակ անձանց կարողությունների բարձրացման ուղղությամբ։
«Գործակալությունների միջոցով աշխատանք փնտրողները 17 հազար են, և այդ անձանց աշխատանքի տեղավորման հետ կապված խնդիրները ներառել ենք ոչ միայն նրանց զբաղվածության ծրագրերում ընդգրկելով, այլ նաև տարբեր ծառայություններ մատուցելով։ Գործատուների և աշխատանք փնտրողների միջև համապատասխան կառուցակարգերով ապահովել ենք այդ մարդկանց աշխատանք գտնելը»,- ասաց Արտեմ Ասատրյանը։
Նրա խոսքով` ծրագրերի ավարտից հետո շահառուն առնվազն մեկ-երկու տարի հետո պետք է շարունակի լինել զբաղված, որպեսզի իրենք կարողանան գնահատել` արդյունավե՞տ են եղել այդ ծրագրերը և պետք է արդյո՞ք շարունակել։
Կարինե Պողոսյանը, այդուամենայնիվ, նկատեց, որ գործազուրկների թիվը ոչ թե նվազել է, այլ աճել։
Արտեմ Ասատրյանն էլ պատասխանեց, որ իրենց համար առաջին հերթին կարևոր են տնտեսական ակտիվությունը, տնտեսական աճն ու համապատասխան աշխատատեղերի ստեղծումը։
