ԵՐԵՎԱՆ, 24 հոկտեմբերի — Sputnik. Հայաստանի համար առաջնային գործընկերը Ռուսաստանն է, նույնիսկ ԵՄ-ի հետ հավասարազոր համագործակցության համատեքստում, կարծում է ՀՀ ԱԺ պատգամավոր, Մոլդովա-Հայաստան միջխորհրդարանական բարեկամության խմբի ղեկավար Հայկ Բաբուխանյանը։
«Հայաստանը գնում է բոլոր խաղացողների հետ համագործակցության ճանապարհով, բայց երկրի համար առաջնահերթ է Ռուսաստանի հետ գործակցությունը։ Մեզ մտահոգում է այն, թե ինչ է տեղի ունեցել ԵՄ-ի հետ համաձայնագիրը ստորագրելուց հետո Մոլդովայում, Վրաստանում և Ուկրաինայում», — Sputnik Արմենիա մուլտիմեդիոն կենտրոնում կայացած Երևան-Քիշնև տեսակապի ժամանակ ասաց Բաբուխանյանը։
Նրա խոսքով` այսօր դեռ հստակ չէ, թե ինչ է ստորագրվելու։ Բրյուսելն անդադար Երևանի առջև նոր խնդիրներ է դնում` հայկական կոնյակի անվանափոխություն, ԱԷԿ-ի փակում և այլն։
«ԵՄ-ին չի հետաքրքրում այն, թե իրականում ինչն է մտահոգում հայ հասարակությանը. Ադրբեջանի, Թուրքիայի կողմից շրջափակումը, Հայոց ցեղասպանության ճանաչումն ամբողջ աշխարհում և մի շարք այլ հարցեր», — ասաց Բաբուխանյանը։
Նրա ասածը հաստատեց նաև «Այլընտրանք» հետազոտական կենտրոնի ղեկավար, տնտեսական գիտությունների դոկտոր, պրոֆեսոր Թաթուլ Մանասերյանը։
Փորձագետը նշեց, որ հետխորհրդային տարածքի երկրները պետք է միավորվեն ընդհանուր խնդիրների դեմ պայքարում` անկախ արտաքին քաղաքական ուղղություններից։
«Տնտեսական անվտանգության սպառնալիքի պես խնդիրների դեմ սխալ է պայքարել եվրոպական զարգացած երկրների մեթոդներով։ Մենք պետք է այդ երկրների փորձը օգտագործենք` հարմարեցնելով մեր պետություններին», — ասաց Մանասերյանը։
Մոլդովայի գործընկերները Հայաստանին խորհուրդ տվեցին ուշադիր ընթերցել Հայաստան-ԵՄ շրջանակային համաձայնագրի տեքստը։
«Ասոցացման համաձայնագրի ստորագրումից հետո երկիրը կառավարվում է դրսից և չի կարողանում կիրառել «ինչ ուզում եմ, այն էլ անում եմ» սկզբունքը», — տեսակապի ժամանակ ասաց Մոլդովայի Հանրապետության խորհրդարանի Մոլդովա-Հայաստան միջխորհրդարանական բարեկամության խմբի ղեկավար, տնտեսագիտության դոկտոր Վլադիմիր Գոլովատյուկը։
Նրա խոսքով` դեռ 2005 թվականին Մոլդովայում եվրաինտեգրումն ընկալում էին որպես ԵՄ չափորոշիչների ներդրում, որոնք դրական կազդեն երկրի վրա։ Գործնականում այլ կերպ եղավ` բնակչությունը պառակտվեց, տնտեսությունն անկում գրանցեց։
«Արևելյան գործընկերություն» ծրագիրը Եվրամիության հետ ասոցացման հեռանկար էր նախատեսում։ Ծրագրվում էր, որ Երևանը ԵՄ-ի հետ ասոցացման ու ազատ տնտեսական գոտու մասին համաձայնագիրը կստորագրի 2013 թվականին, Արևելյան գործընկերության վիլնյուսյան գագաթնաժողովի ժամանակ, սակայն դրանից երկու ամիս առաջ Հայաստանը հայտարարեց, որ մտադիր է Մաքսային միությանն անդամակցել ու մասնակցել եվրասիական ինտեգրմանը։ Հայաստանը Եվրասիական տնտեսական միությանը միացավ 2015 թվականի հունվարին։
2015 թվականի հոկտեմբերի 12-ին, Լյուքսեմբուրգում արտաքին գործերի նախարարների մակարդակով անցկացվող նիստի ընթացքում ԵՄ-ն լիազորեց Եվրոպական խորհրդին բանակցություններ սկսել Հայաստանի հետ նոր համապարփակ համաձայնագրի վերաբերյալ, որը կփոխարինի ԵՄ-ի ու ՀՀ համագործակցության մասին համաձայնագիրը։
Հայաստանը նախատեսում է պայմանագիրը ստորագրել Արևելյան գործընկերության առաջիկա գագաթնաժողովին, որը տեղի կունենա 2017 թվականի նոյեմբերի 24-ին, Բրյուսելում։
