ԵՐԵՎԱՆ, 24 հոկտեմբերի — Sputnik. Ռուսաստանն աբխազական երկաթուղու բացման շուրջ բանակցություններ է վարում Թբիլիսիի և Սուխումի հետ: Այդ մասին այսօր Երևանում լրագրողներին ասաց Ռուսաստանի տրանսպորտի նախարար Մաքսիմ Սոկոլովը, որը Հայաստան է ժամանել վարչապետ Դմիտրի Մեդվեդևի գլխավորած ռուսական պատվիրակության կազմում:
«Մենք բաց ենք թե՛ վրացական, թե՛ աբխազ գործընկերների հետ երկխոսության համար: Բանակցությունները վարում է ԱԳՆ-ն Կարասին-Աբաշիձե շփումների միջոցով: Վերջին հանդիպումը կայացել է այս տարվա սեպտեմբերին», — ասաց Սոկոլովը:
Արդյունքը, ըստ նրա, կարող է լինել ոչ միայն երկաթուղու բացումը, այլ նաև ավտոմոբիլային հաղորդակցությունը:
«Մենք աշխատում ենք նաև Հարավային Օսեթիայի ուղղությամբ: Այնտեղ արդեն պատրաստ է մեր անցակետը», — ասաց Սոկոլովը:
Նրա խոսքով, մինչ օրս չի հաջողության չեն կարողացել հասնել վրացական կողմի հետ բանակցությունների շրջանակում:
«Բայց մենք աստիճանաբար և հետևողականորեն շարժվում ենք առաջ, հատկապես շվեյցարական ընկերության հետ 2011-ին կնքված տարանցիկ հաղորդակցության մասին համաձայնագրի շրջանակում», — ասաց Սոկոլովը:
2017 թվականի ամռանը ՌԴ փոխարտգործնախարար Գրիգորի Կարասինը և Վրաստանի վարչապետի հատուկ ներկայացուցիչ Զուրաբ Աբաշիձեն պայմանավորվել են իրականացնել 2011թ.-ին Ռուսաստանի և Վրաստանի միջև կնքված «Առևտրային միջանցքների մասին» պայմանագիրը։
Կողմերը պայմանավորվել են ավարտել 2011 թ. համաձայնագրի իրականացման վերաբերյալ խորհրդատվությունները և պայմանագրեր կնքել շվեյցարական SGS ընկերության հետ, որը կվերահսկի, ապրանքների և բեռների տեղափոխումը Ռուսաստանից Վրաստան և հակառակ ուղղությամբ` Աբխազիայի և Հարավային Օսեթիայի «առևտրային միջանցքներով»:
