ԵՐԵՎԱՆ, 24 հոկտեմբերի — Sputnik. Ռուսաստանը պատրաստ է մասնակցել Հայաստանի հարավում ազատ տնտեսական գոտու զարգացմանը: Այդ մասին Երևանում հայտարարեց Ռուսաստանի վարչապետ Դմիտրի Մեդվեդևը հայ գործընկերոջ` Կարեն Կարապետյանի հետ ճեպազրույցում:
«Մենք պատրաստ ենք մասնակցել ազատ առևտրի գոտու զարգացմանը` նաև մեր ռուսական բիզնեսն այնտեղ հրավիրելով։ Գործընկերներն առաջարկեցին համաֆինանսավորման այլ ձևեր: Մենք կմտածենք, թե ինչպես այդ ամենը կազմակերպենք», — ասաց Մեդվեդևը:
Նրա խոսքով, հնարավոր է օգտագործել ռուսական զարգացման ինստիտուտները, օրինակ` Ուղիղ ներդրումների հիմնադրամը, Վնեշէկոնոմբանկը և Ռոսէքսպոկենտրոնը:
Ըստ Մեդվեդևի` գլխավորը այն է, որ «այդ ամենն իր պտուղներն ունենա»:
ՀՀ վարչապետ Կարեն Կարապետյանը իր հերթին նշեց, որ Մեղրու ազատ տնտեսական գոտին լավ հարթակ է ռուսական բիզնեսի համար, որը հետաքրքրված է Իրանով:
«Ավելին, մենք բաց ենք համագործակցության համար ոչ միայն ռուսական կապիտալի տեղաբաշխման, այլև համատեղ ներդրումային համագործակցության համար», — ասաց Կարապետյանը:
Հայաստանի Սյունիքի մարզում Հայաստանի և Իրանի միջև ազատ առևտրի գոտու ստեղծումը պետք է կապող օղակ դառնա իրանական կողմի և ԵԱՏՄ-ի միջև: Ենթադրվում է, որ եվրոպական բիզնեսի ներկայացուցիչները հետագայում կկարողանան օգտվել այս կամրջից:
