ԵՐԵՎԱՆ, 24 հոկտեմբերի — Sputnik. «Գազպրոմ» ընկերության վարչության նախագահ Ալեքսեյ Միլլերը հայտնել է, որ 2018 թվականին Հայաստան մատակարարվող գազի գինը կպահպանվի հազար խորանարդ մետրի դիմաց 150 դոլարի մակարդակում։ Այս մասին նա ասել է Երևանում Հայաստանի և Ռուսաստանի կառավարությունների ղեկավարների ընդլայնված կազմով հանդիպման ընթացքում։
Նրա խոսքով` «Գազպրոմը» նախատեսում է, որ երկիր մատակարարվող գազի տարեկան ծավալները կավելանան։
ՌԴ վարչապետ Դմիտրի Մեդվեդևն էլ հայտնել է, որ Հայաստանը տնտեսության համար դա օգտակար կլինի և կօգնի երկրի զարգացմանը։
«Մենք առանցքային որոշում ենք կայացրել և հատուկ գինը պահպանելու ենք նաև հաջորդ տարի»,- ասել է Մեդվեդևը։
«Գազպրոմ Արմենիա» ՓԲԸ ապահովում է Հայաստանի Հանրապետության ներքին շուկայում բնական գազի մատակարարումն ու իրացումը:
Գազափոխադրման համակարգում Ընկերության կողմից սպասարկվող մայրուղային գազատարերի և գազատար-ճյուղավորումների ընդհանուր երկարությունը կազմում է 1682,2 կմ: Գազաբաշխման համակարգում սպասարկվում են 14 902 կմ բարձր,միջին և ցածր ճնշման գազատար, օժանդակ ինժեներական կառույցներ:
«Գազպրոմ Արմենիա» ՓԲԸ–ն, որը «Գազպրոմ» ՀԲԸ 100-տոկոսանոց դուստր ընկերությունն է, Հայաստանի տնտեսության առաջատար ընկերություններից մեկն է և արձանագրում է լավագույն ցուցանիշներ` զբաղեցնելով առաջատար և կայուն դիրք հանրապետության տնտեսության հանգուցային ճյուղերից մեկը հանդիսացող գազաէներգետիկ ոլորտում։
